BENKI YA NBC YAENDELEA KUKUZA UJUMUISHI WA KIFEDHA KUPITIA HUDUMA YA "LA RIBA"

Mkuu wa Mkoa wa Dodoma, Rosemary Senyamule (kushoto), akipokea zawadi maalum ya mwezi mtukufu wa Ramadhani kutoka kwa Mkurugenzi wa Fedha wa Benki ya NBC, Rayson Foya (katikati), wakati wa hafla ya futari iliyoandaliwa na benki hiyo kwa ajili ya wateja wake jijini Dodoma mwishoni mwa wiki. Anayeshuhudia ni Mkuu wa Kanda ya Kati wa Benki ya NBC, Miraji Msuya. Hafla hiyo ilihudhuriwa na wateja na wadau mbalimbali wa benki hiyo, wakiwemo viongozi wa serikali na dini.

Mkurugenzi wa Fedha wa Benki ya NBC, Rayson Foya (mbele), akiwaongoza wageni waalikwa kupata futari wakati wa hafla ya futari iliyoandaliwa na Benki ya NBC kwa ajili ya wateja wake jijini Dodoma mwishoni mwa wiki.

Mkuu wa Mkoa wa Dodoma, Rosemary Senyamule (katikati), akifuatilia matukio mbalimbali wakati wa hafla ya futari iliyoandaliwa na Benki ya NBC kwa ajili ya wateja wake jijini Dodoma mwishoni mwa wiki. Wengine pichani ni Meneja wa Benki ya NBC Kanda ya Pwani, Zubeider Haroun (kulia), na Meneja wa Benki ya NBC Tawi la Dodoma, Happiness Kizigira.

Dodoma, Machi 13, 2026 — Mkuu wa Mkoa wa Dodoma, Rosemary Senyamule, amepongeza jitihada za Benki ya NBC za kupanua wigo wa ujumuishi wa kifedha kupitia huduma yake ya kibenki isiyo na riba, La Riba (Islamic Banking), akisema huduma hiyo imewafungulia Waislamu milango mipya ya kushiriki kikamilifu katika shughuli za kiuchumi bila kwenda kinyume na misingi ya imani yao.

Bi. Senyamule alitoa pongezi hizo mwishoni mwa wiki jijini Dodoma wakati akiongoza hafla ya futari iliyoandaliwa na Benki ya NBC kwa ajili ya wateja wake wenye imani ya Kiislamu pamoja na wadau mbalimbali, wakiwemo viongozi wa dini na serikali. Hafla hiyo pia ilihudhuriwa na viongozi na maofisa wa benki hiyo wakiongozwa na Mkurugenzi wa Fedha wa NBC, Rayson Foya, aliyemwakilisha Mkurugenzi Mtendaji wa benki hiyo, Theobald Sabi.

La Riba Kuchochea Ushiriki wa Waislamu Katika Mfumo Rasmi wa Fedha

Akizungumza katika hafla hiyo, Bi. Rosemary Senyamule alisema huduma za kifedha zinazozingatia misingi ya Kiislamu zimekuwa chachu muhimu ya kuwawezesha waumini wa dini hiyo kushiriki kikamilifu katika mfumo rasmi wa kifedha, hivyo kuongeza kasi ya shughuli za kiuchumi katika jamii.

“Huduma ya La Riba imewafungulia wenzetu wenye imani ya Kiislamu milango ya kushiriki kikamilifu katika huduma za kifedha bila hofu ya kwenda kinyume na misingi ya dini yao. Hii ni hatua muhimu sana katika kuimarisha ujumuishi wa kifedha na kuhamasisha maendeleo ya wananchi,” alisema Bi. Senyamule.

Aliongeza kuwa uwepo wa huduma kama hiyo unachochea wananchi wengi zaidi kutumia taasisi rasmi za kifedha kukuza biashara, kilimo na shughuli nyingine za kiuchumi, hatua inayochangia kukuza uchumi wa mkoa na taifa kwa ujumla.

Zaidi ya Wateja 24,000 Wanahudumiwa Kupitia La Riba

Kwa upande wake, Bw. Rayson Foya alisema huduma ya La Riba imeendelea kupata mwitikio mkubwa kutoka kwa wateja wenye imani ya Kiislamu nchini, huku ikiwapa fursa ya kupata huduma za kifedha zinazozingatia misingi ya dini yao.

Alisema kupitia dirisha hilo la huduma za kibenki, zaidi ya wateja 24,000 wanahudumiwa kwa sasa, wakiwa na amana zinazozidi shilingi bilioni 90, huku uwezeshaji wa kifedha uliotolewa kupitia mfumo huo ukifikia zaidi ya shilingi bilioni 48.

“Takwimu hizi zinaonesha wazi kuwa huduma za La Riba zimepokelewa vizuri na wateja wetu wenye imani ya Kiislamu. Tutaendelea kuimarisha huduma hizi ili kuwapa wateja wetu suluhisho za kifedha zinazolingana na mahitaji na imani zao,” alisema Bw. Foya.

Aliongeza kuwa katika kipindi hiki cha mwezi mtukufu wa Ramadhani, benki hiyo inaona ni muhimu kuimarisha mahusiano yake na wateja pamoja na wadau kwa kushirikiana nao katika shughuli za kijamii na kiuchumi.

Huduma Mbalimbali za Kiislamu

Kwa mujibu wa Benki ya NBC, huduma za La Riba zinajumuisha bidhaa mbalimbali za kifedha zinazozingatia misingi ya Kiislamu, zikiwemo:

• Akaunti za akiba binafsi
• Akaunti za biashara
• Akaunti za uwekezaji wa muda maalum (Fixed Investment Accounts)
• Huduma za uwezeshaji wa kifedha kupitia mfumo wa Murabaha

Huduma hizi zimebuniwa ili kutoa suluhisho mbadala kwa wateja wanaotaka kufanya miamala ya kifedha bila kutozwa riba.

NBC Dodoma Marathon Yaendelea Kuchochea Uchumi wa Jiji

Katika hatua nyingine, Bi. Rosemary Senyamule aliipongeza Benki ya NBC kwa mchango wake katika kuendeleza michezo na ustawi wa jamii kupitia tukio la NBC Dodoma Marathon, ambalo limeendelea kuwa jukwaa muhimu la kuchochea uchumi wa jiji la Dodoma.

Alisema mbio hizo, ambazo mwaka uliopita zilivutia zaidi ya washiriki 12,000, zimekuwa zikichochea shughuli za kiuchumi katika sekta mbalimbali zikiwemo biashara, utalii na huduma. Pia zimechangia kukusanya fedha kwa ajili ya kuboresha huduma za afya ya mama na mtoto.

Akizungumzia mbio hizo, Bw. Rayson Foya alisisitiza kuwa Benki ya NBC itaendelea kuunga mkono juhudi za maendeleo ya jamii kupitia miradi mbalimbali ya kijamii, ikiwemo kuendeleza mbio hizo ambazo mbali na kukuza michezo pia zinachangia kuokoa maisha kupitia miradi ya afya.