BENKI YA TIB CORPORATE YATOA MILIONI 10 KWA AJILI YA MADAWATI YA SHULE ZA MSINGI ZA MKOA WA MBEYA

Mkurugenzi Mtendaji wa TIB Corporate Bank, Bwana Frank Nyabundege (kushoto) akimkabidhi Mkuu wa Mkoa wa Mbeya, Amos Makalla hundi ya shilingi milioni 10 kwa ajili ya kuchangia ununuzi wa madawati ya shule za mkoa wa Mbeya.

Mkuu wa Mkoa wa Mbeya, Amos Makalla akimuelezea jambo Mkurugenzi Mtendaji wa TIB Corporate Bank, Bwana Frank Nyabundege (kushoto) wakati benki ya TIB Corporate ilikabidhi mchango wa shilingi milioni 10 kwa ajili ya ununuzi wa madawati.

Mkurugenzi Mtendaji wa TIB Corporate Bank, Bwana Frank Nyabundege (kushoto) akimkabidhi Mkuu wa Mkoa wa Mbeya, Amos Makalla hundi ya shilingi milioni 10 kwa ajili ya kuchangia ununuzi wa madawati ya shule za mkoa wa Mbeya. Kushoto ni wafanyakazi wa benki ya TIB Corporate na kulia ni watumishi wa Mkoa wa Mbeya.

Mbeya, 30 Julai, 2016: Benki ya TIB Corporate imetoa mchango wa shillingi milioni 10 kwa ajili ya kununua madawati ya wanafunzi wa shule za msingi za mkoa wa Mbeya ili kupunguza tatizo la uhaba wa madawati mkoani humo.

Akizungumza wakati wa makabidhiano hayo, Mkurugenzi Mtendaji Mkuu wa benki ya TIB, Bw. Frank Nyabundege alisema ili wanafunzi waweze kufanya vizuri Katika masomo yao wanahitaji kuwa na mindombinu bora na mazingira mazuri ya kujifunza. 'Sisi kama taasisi tunaamini kuwa uhaba wa madawati ni tatizo kubwa sana katika maendeleo ya sekta ya elimu hivyo basi msaada huu utasaidia kupunguza tatizo hili katika sekta ya elimu nchini’ alisema Bw Nyabundege.

Bw.Nyabundege pia alieleza jinsi taasisi yake ilivyojizatiti katika kuhakikisha inashirikiana na serekali katika jitihada zake za kuboresha sekta ya elimu nchini.

'Mazingira rafiki ni muhimu sana kwa ajili ya kujifunzia,hivyo ni matumaini yetu mchango wetu wa madawati utachangia katika kuboresha zaidi mazingira ya wanafunzi na hivyo kuwahamasisha kuendelea kufanya vizuri katika masomo yao' alisema Bw. Nyabundege.

Akipokea msaada huo, Mkuu wa Mkoa wa Mbeya, Bw.Amos Makalla ameipongeza benki hiyo kwa kuwa mfano bora wa kushirikiana na serikali katika jitihada zake za kupunguza tatizo la uhaba wa madawati.

'Tunatoa shukurani zetu za dhati kwa benki ya TIB Corporate kwa mchango wao katika kuhamasisha na kusaidia kukua kwa kiwango bora cha elimu kwenye shule zetu’ alisema Bw. Makalla.