SERIKALI YAZINDUA KARIKOO FESTIVAL 2026, YAPONGEZA UDHAMINI NA BIDHAA BUNIFU ZA NMB

Dar es Salaam - Septemba 26, 2026; SERIKALI imeishukuru Benki ya NMB kwa kuendelea kudhamini Tamasha la Kariakoo, Kariakoo Festival 2026, huku ikiipongeza benki hiyo kwa ubunifu katika huduma na bidhaa zinazolenga kuchochea ukuaji wa biashara na uchumi miongoni mwa wafanyabiashara nchini.

Pongezi hizo zimetolewa na Naibu Waziri wa Viwanda na Biashara, Mhe. Dennis Londo, wakati akizindua rasmi msimu wa tatu wa Kariakoo Festival 2026, jukwaa linalowakutanisha wafanyabiashara na wanunuzi kutoka ndani na nje ya Tanzania.

Tamasha hilo, linaloratibiwa na Kampuni ya One Voice Events na kudhaminiwa na NMB Bank, limezinduliwa Ijumaa, Septemba 25, 2026, na linatarajiwa kuendelea hadi Septemba 27, 2026.

Akizungumza wakati wa uzinduzi huo, Naibu Waziri Londo aliitaka jamii ya wafanyabiashara kutumia fursa inayotolewa na Kariakoo Festival kujenga na kukuza biashara zao, sambamba na kuunga mkono juhudi za nchi kuelekea Uchumi Usio na Utegemezi wa Pesa Taslimu (cashless economy).

Naibu Waziri huyo pia aliipongeza NMB kwa ubunifu katika kuandaa huduma na bidhaa zinazokidhi mahitaji ya wafanyabiashara, zikiwemo NMB SME’s Credit Card na Mshiko Fasta.

Kwa upande wake, Mkuu wa Idara ya Biashara wa NMB, Alex Mgeni, alisema benki hiyo imetumia jukwaa la Kariakoo Festival kuwafikishia wafanyabiashara na wajasiriamali huduma mbalimbali zinazolenga kurahisisha shughuli zao za kila siku.

Alisema huduma hizo ni pamoja na NMB SME’s Credit Card, NMB Mkononi, NMB Tap to Pay, NMB Lipa Namba na Mshiko Fasta.

“Kupitia Kariakoo Festival, tumewaletea wafanyabiashara huduma bora na rafiki zinazolenga kuwawezesha kufanya biashara kwa ufanisi zaidi na kutumia fursa zinazotokana na teknolojia na huduma za kifedha,” alisema Mgeni.

Naye Mwenyekiti wa Jumuiya ya Wafanyabiashara wa Kariakoo (JWK), Severine Mushi, aliishukuru Serikali kwa kuweka mazingira wezeshi kwa ajili ya kufanya biashara nchini.

Alisema mazingira hayo yameendelea kuvutia taasisi za fedha, ikiwemo NMB, kuwekeza katika shughuli na majukwaa yanayowakutanisha wafanyabiashara na wadau wengine wa biashara kutoka ndani na nje ya Tanzania.

Kariakoo Festival 2026 inalenga kutoa fursa kwa wafanyabiashara kuonesha bidhaa zao, kutafuta masoko mapya, kujenga mitandao ya kibiashara na kuunganishwa na wanunuzi kutoka maeneo mbalimbali.

Tamasha hilo pia linaendelea kuwa jukwaa muhimu la kuhamasisha matumizi ya teknolojia na mifumo ya kidijitali katika biashara, ikiwa ni sehemu ya juhudi za kuongeza ufanisi na kuharakisha safari ya Tanzania kuelekea uchumi unaotumia zaidi malipo ya kidijitali.

---

Fuatilia Kitomari Banking & Finance Blog kwa habari zaidi kuhusu biashara, benki, fedha na uchumi.

Mitandao ya kijamii:
LinkedIn | Facebook | Instagram | X (Twitter)