NBC YACHOCHEA UWEKEZAJI AFRIKA KUPITIA MIFUKO YA FEDHA, MADINI NA TEKNOLOJIA

Mkurugenzi Mtendaji wa Benki ya NBC, Theobald Sabi, akitoa nasaha zake wakati wa uzinduzi wa mifuko mitatu mipya ya uwekezaji iliyoanzishwa na kampuni ya iTrust Finance, inayolenga sekta za huduma za kifedha, madini, mawasiliano na teknolojia barani Afrika. Benki ya NBC inahudumu kama mdhamini na mtunzaji wa mali za uwekezaji (trustee and custodian) wa mifuko hiyo. Hafla ya uzinduzi ilifanyika jijini Dar es Salaam jana.

Mkurugenzi Mtendaji wa Benki ya NBC, Theobald Sabi (wa pili kushoto), akiwa pamoja na wadau wengine, akiwemo Mkurugenzi wa Usimamizi na Uchunguzi wa Masoko wa Mamlaka ya Masoko ya Mitaji na Dhamana (CMSA), Exaut Julius (wa kwanza kushoto), wakifuatilia uzinduzi wa mifuko mitatu mipya ya uwekezaji iliyoanzishwa na kampuni ya iTrust Finance, inayolenga sekta za huduma za kifedha, madini, mawasiliano na teknolojia barani Afrika.

Baadhi ya maofisa waandamizi wa Benki ya NBC wakifuatilia hafla hiyo.

Dar es Salaam; Oktoba 28, 2026 - Benki ya Taifa ya Biashara (NBC) imeendelea kuimarisha nafasi yake katika soko la mitaji nchini kwa kushirikiana na kampuni ya iTrust Finance kuzindua mifuko mitatu mipya ya uwekezaji inayolenga sekta za huduma za kifedha, madini, mawasiliano na teknolojia barani Afrika.

Kupitia mifuko hiyo, NBC itahudumu kama mdhamini na mtunzaji wa mali za uwekezaji, jukumu linalolenga kuimarisha usalama wa mali za wawekezaji na kuunga mkono ukuaji wa bidhaa za uwekezaji zinazowaunganisha wawekezaji wa Tanzania na fursa zilizopo katika masoko ya hisa barani Afrika.

Mifuko hiyo ni iAfrica Financials ETF, iAfrica Mining ETF na iAfrica Telco and Tech ETF, ambayo itawawezesha wawekezaji binafsi na taasisi kupata fursa ya kuwekeza katika kampuni zilizoorodheshwa kwenye masoko ya hisa barani Afrika kupitia Soko la Hisa la Dar es Salaam (DSE).

Akizungumza katika uzinduzi huo uliofanyika jijini Dar es Salaam, Mkurugenzi Mtendaji wa NBC, Theobald Sabi, alisema kuimarika kwa uhusiano kati ya masoko ya mitaji barani Afrika kunahitaji taasisi imara za kifedha zinazoweza kulinda maslahi ya wawekezaji na kurahisisha uwekezaji katika masoko mbalimbali.

“Kadiri masoko ya mitaji barani Afrika yanavyozidi kuunganishwa, wawekezaji wanahitaji taasisi imara na zinazoaminika za kifedha zinazoweza kulinda mali zao na kuwezesha miamala ya kuvuka mipaka kuwa yenye ufanisi, usalama na gharama nafuu,” alisema Sabi.

UWEKEZAJI KATIKA SEKTA MUHIMU ZA UCHUMI

Mifuko hiyo mitatu imejikita katika sekta zenye nafasi muhimu katika maendeleo ya uchumi wa Afrika.

Mfuko wa iAfrica Financials ETF unalenga sekta ya huduma za kifedha, ambayo ni mhimili wa shughuli za kiuchumi na upatikanaji wa huduma za kifedha. iAfrica Mining ETF unalenga sekta ya madini, inayochangia matumizi ya rasilimali za asili na mapato ya mauzo ya nje, huku iAfrica Telco and Tech ETF ukilenga sekta za mawasiliano na teknolojia zinazochochea ubunifu na upanuzi wa huduma za kidijitali.

Kupitia mifuko hiyo, wawekezaji wanapata fursa ya kushiriki katika sekta tofauti za uchumi wa Afrika kwa kutumia bidhaa za uwekezaji zinazopatikana kupitia soko la mitaji la Tanzania.

Kwa mujibu wa NBC, uzinduzi huo unaendeleza ushirikiano wa muda mrefu kati ya benki hiyo na iTrust Finance katika kuanzisha na kusimamia bidhaa za uwekezaji.

Ushirikiano huo tayari umewezesha utekelezaji wa Mfuko wa Uwekezaji wa Hisa za Kampuni Kubwa za Jumuiya ya Afrika Mashariki (EAC Large Cap ETF), ambao wakati wa uuzaji wa awali wa vipande vyake ulivutia uwekezaji wa Sh bilioni 54.03, dhidi ya lengo la Sh bilioni 10.

Matokeo hayo yanaonesha mwitikio wa wawekezaji kwa bidhaa zinazowawezesha kushiriki katika masoko ya mitaji, huku mifuko mipya ya iAfrica ikipanua wigo wa sekta zinazoweza kufikiwa kupitia uwekezaji huo.

UUZWAJI WA VIPANDE KUENDELEA HADI NOVEMBA 27, 2026

Sabi alisema NBC itaendelea kuwawezesha wawekezaji kupata taarifa na msaada wa kujiunga na mifuko hiyo kupitia matawi ya benki hiyo nchini kote na njia zake za huduma za kibenki za kidijitali, ikiwemo programu ya simu.

Kipindi cha uuzaji wa awali wa vipande vya mifuko hiyo kilianza Oktoba 26 na kinatarajiwa kufungwa Novemba 27, 2026.

Hata hivyo, aliwahimiza wawekezaji kusoma kwa makini nyaraka za ofa, kuelewa malengo ya kila mfuko na kutathmini hatari zinazohusiana na uwekezaji kabla ya kufanya maamuzi.

CMSA YASISITIZA USHIRIKIANO WA WADAU

Uzinduzi huo uliongozwa na Mkurugenzi wa Usimamizi na Uchunguzi wa Masoko wa Mamlaka ya Masoko ya Mitaji na Dhamana (CMSA), Exaut Julius, aliyemwakilisha Mtendaji Mkuu wa mamlaka hiyo, CPA Nicodemus Mkama.

Julius alisema ushirikiano kati ya wasimamizi wa sekta, wasimamizi wa mifuko ya uwekezaji, wadhamini na watunzaji wa mali za uwekezaji ni muhimu katika kuimarisha uwazi, kulinda maslahi ya wawekezaji na kujenga imani katika soko la mitaji.

“Ushirikiano miongoni mwa wadau wa masoko ya mitaji ni muhimu katika kujenga imani ya wawekezaji, kuimarisha uwazi na kupanua fursa za uwekezaji,” alisema Julius.

Hafla hiyo pia ilihudhuriwa na wawakilishi wa Soko la Hisa la Dar es Salaam (DSE) na Benki Kuu ya Tanzania (BoT).

iTRUST FINANCE YAANGAZIA FURSA ZA MUDA MREFU

Kwa upande wake, Mwenyekiti wa Bodi ya Wakurugenzi wa iTrust Finance, Aunali Rajabali, alisisitiza umuhimu wa nidhamu na mtazamo wa muda mrefu katika uwekezaji, akitumia uzoefu wake wa miaka 25 katika masoko ya hisa ya Afrika Mashariki kueleza fursa zilizopo barani Afrika.

Alisema idadi kubwa ya vijana, utajiri wa rasilimali za asili na kuongezeka kwa matumizi ya teknolojia ni miongoni mwa mambo yanayochochea fursa za uwekezaji katika bara hilo.

Rajabali pia alitambua mchango wa washirika wa kitaasisi, wakiwemo NBC, katika kusaidia uanzishaji na usimamizi wa bidhaa mpya za uwekezaji.

“Ushirikiano imara kati ya taasisi ni muhimu katika kuanzisha bidhaa za uwekezaji ambazo wawekezaji wanaweza kuzipokea kwa imani. Ushiriki wa NBC ni sehemu muhimu ya mifumo ya kitaasisi inayounga mkono mipango yetu ya uwekezaji,” alisema Rajabali.

Naye Mkurugenzi wa Huduma za Kibenki kwa Biashara wa NBC, Elvis Ndunguru, alisema ushirikiano huo unaonesha dhamira ya benki hiyo ya kuunga mkono bidhaa bunifu za uwekezaji zinazowaunganisha wawekezaji na fursa zilizopo katika masoko ya mitaji barani Afrika.

Aliongeza kuwa taasisi za kifedha zinazoaminika zina jukumu muhimu katika kupanua ushiriki wa wawekezaji na kuimarisha mifumo ya kifedha inayohitajika kwa ukuaji endelevu wa uchumi.

Uzinduzi wa mifuko hiyo mitatu unaongeza chaguo la bidhaa za uwekezaji katika soko la mitaji la Tanzania, huku ukiwawezesha wawekezaji kutafuta fursa katika sekta mbalimbali za uchumi wa Afrika kwa kuzingatia malengo yao ya uwekezaji na hatari zinazohusika.

---

Endelea kufuatilia Kitomari Banking & Finance Blog kwa habari na uchambuzi kuhusu benki, fedha, masoko ya mitaji na maendeleo ya uchumi.

Tufuatilie kwenye mitandao ya kijamii:

LinkedIn: https://www.linkedin.com/feed/

Facebook: https://www.facebook.com

Instagram: https://www.instagram.com

X (Twitter): https://x.com/home