WAZIRI MKUU MWIGULU NCHEMBA KUONGOZA WASHIRIKI 13,000 NBC DODOMA MARATHON 2026

Mkuu wa Mkoa wa Dodoma, Bi. Rosemary Senyamule (katikati) akipokea sweta maalum la mbio za NBC Dodoma Marathon kutoka kwa waandaaji na wadhamini wa mbio za NBC Dodoma Marathon ikiwa ni ishara ya kukamilisha maandalizi ya mbio pamoja na kumkaribisha rasmi mkuu wa mkoa huyo kwenye mbio hizo zinazotarajiwa kufanyika Julai 26 mwaka huu kwenye Uwanja wa Jamhuri jijini Dodoma. Kulia ni Mkuu wa Kitengo cha Mawasiliano na Mahusiano ya Umma wa Benki ya NBC, Godwin Semunyu, Kaimu Katibu Tawala wa Mkoa wa Dodoma, Bi. Mwajabu Nyamkumora (wa pili kulia) Mkuu wa Masoko na Uwezeshaji Vodacom Tanzania, Bw. Joseph Sayi (kushoto) na Meneja Masoko wa GSM Group, Bi. Neema Loth. Hafla ya makabidhiano hayo imefanyika leo kwenye ofisi ya Mkuu wa mkoa Dodoma.

DODOMA, Julai 22, 2026: Waziri Mkuu wa Jamhuri ya Muungano wa Tanzania, Mhe. Mwigulu Lameck Nchemba (Mb.), anatarajiwa kuongoza zaidi ya washiriki 13,000 katika msimu wa saba wa NBC Dodoma Marathon, utakaofanyika Julai 26, 2026 katika Uwanja wa Jamhuri, jijini Dodoma.

Wakati maandalizi ya mbio hizo yakifikia tamati, Mkuu wa Mkoa wa Dodoma, Bi. Rosemary Senyamule, ametoa wito kwa madereva kutumia Barabara ya Mzunguko (Ring Road) siku ya mbio hizo ili kupunguza msongamano wa magari katikati ya jiji na kuhakikisha usalama wa washiriki pamoja na watumiaji wengine wa barabara.

Akizungumza wakati akipokea jezi rasmi ya NBC Dodoma Marathon kutoka kwa waandaaji, Benki ya Taifa ya Biashara (NBC), Bi. Senyamule alisema maandalizi ya mbio hizo yamekamilika kwa mafanikio na sasa Dodoma ipo tayari kupokea maelfu ya washiriki na wageni kutoka sehemu mbalimbali nchini.

RC Dodoma Awataka Wananchi Kushiriki na Kutoa Ushirikiano

Bi. Senyamule aliwataka wakazi wa Dodoma kujitokeza kwa wingi kandokando ya barabara kuwapa hamasa washiriki wa mbio hizo, huku akiwashauri wananchi ambao hawana ulazima wa kutumia magari yao siku hiyo kujiepusha kuyaingiza katikati ya jiji.

Aidha, aliwasihi wasafiri wanaotoka mikoa mbalimbali kutumia Ring Road ili kurahisisha mtiririko wa magari na kuhakikisha mbio zinafanyika kwa utulivu na usalama.

"Tunawaomba wananchi wajitokeze kwa wingi kuwashangilia washiriki wa mbio hizi. Kwa wale ambao hawana ulazima wa kutumia magari yao siku hiyo, ni vyema wakaepuka kuyaingiza katikati ya jiji ili kupunguza msongamano na kuhakikisha usalama wa washiriki pamoja na watumiaji wengine wa barabara," alisema.

Hafla ya kukabidhi jezi hiyo ilifanyika katika Ofisi ya Mkuu wa Mkoa wa Dodoma na kuhudhuriwa na viongozi mbalimbali wa Serikali, akiwemo Kaimu Katibu Tawala wa Mkoa, Bi. Mwajabu Nyamkumora, viongozi wa NBC wakiongozwa na Mkuu wa Idara ya Mawasiliano na Mahusiano ya Umma, Bw. Godwin Semunyu, pamoja na wawakilishi wa wadhamini wa mbio hizo kutoka GSM Group na Vodacom Tanzania.

Mbio za Viwango vya Kimataifa Zenye Zawadi Kubwa

Bi. Senyamule aliipongeza NBC Bank na wadau wake kwa kuandaa mbio hizo kwa viwango vya kimataifa, akisema zimeendelea kuiweka Dodoma kwenye ramani ya matukio makubwa ya michezo nchini sambamba na kuimarisha hadhi yake kama Makao Makuu ya Tanzania.

Mbio za mwaka huu zitahusisha umbali wa kilomita 5, 10, 21 na 42, huku washindi wa kwanza wa mbio za kilomita 42 kwa upande wa wanaume na wanawake kila mmoja akitarajiwa kujishindia Shilingi milioni 11.5, pamoja na bonasi ya Shilingi milioni 5 iwapo atavunja rekodi ya mwaka uliopita.

Mbio Zinazoleta Mabadiliko Kwenye Sekta ya Afya

Mbali na ushindani wa michezo, Bi. Senyamule alisema NBC Dodoma Marathon imeendelea kuwa chombo muhimu cha kuunga mkono huduma za afya kupitia ajenda zake kuu tatu ambazo ni:

• Kuchangisha fedha za kupunguza vifo vya kina mama na watoto wakati wa kujifungua.
• Kufadhili upasuaji wa watoto wenye matatizo ya moyo.
• Kuimarisha mfuko wa huduma za upandikizaji wa uloto kwa watoto wenye ugonjwa wa selimundu (Sickle Cell).

Alisema malengo hayo yanaifanya NBC Dodoma Marathon kuwa zaidi ya mashindano ya riadha, bali kuwa jukwaa la kuokoa maisha na kuleta matumaini kwa maelfu ya Watanzania.

Fursa Kubwa kwa Uchumi wa Dodoma

Kwa mujibu wa Mkuu huyo wa Mkoa, kwa kipindi cha miaka saba iliyopita mbio hizo zimekuwa kichocheo kikubwa cha ukuaji wa uchumi wa Dodoma kupitia ongezeko la wageni na matumizi katika sekta mbalimbali.

Inakadiriwa kuwa zaidi ya watu 20,000, wakiwemo washiriki, familia zao, mashabiki na watalii, watawasili jijini Dodoma, hali itakayoongeza mahitaji ya huduma za malazi, usafiri, chakula, vinywaji na biashara nyingine ndogo na kubwa.

Aliwahimiza wafanyabiashara, mama lishe, waendesha bodaboda, sekta ya utalii na watoa huduma mbalimbali kutumia fursa hiyo kuongeza kipato chao.

Tamasha la Mvinyo, Expo na Burudani

Mbio za mwaka huu pia zitaambatana na matukio mbalimbali yatakayochochea utalii na biashara, yakiwemo Dodoma Wine Festival, litakalotangaza sekta ya mvinyo na zabibu za Dodoma, pamoja na NBC Dodoma Marathon Expo, litakalowaunganisha wafanyabiashara na wateja kutoka maeneo mbalimbali nchini.

Washiriki na wageni pia watapata burudani kutoka kwa wasanii mbalimbali, akiwemo Marioo, huku wakihimizwa kutembelea vivutio vya utalii vya Dodoma kama vile mashamba ya zabibu na kushuhudia utamaduni wa Wagogo kupitia ngoma za asili.

NBC Yathibitisha Maandalizi Kukamilika

Kwa upande wake, Mkuu wa Idara ya Mawasiliano na Mahusiano ya Umma wa NBC Bank, Bw. Godwin Semunyu, alisema maandalizi yote ya mbio hizo yamekamilika na washiriki kutoka sehemu mbalimbali za Tanzania tayari wameanza kuwasili Dodoma.

Alisema matukio mbalimbali yaliyoandaliwa sambamba na marathon yanalenga kuongeza mchango wa tukio hilo katika kukuza uchumi wa jiji, utalii na burudani.

Bw. Semunyu pia aliwashukuru wadhamini na washirika wote wa NBC Dodoma Marathon kwa mchango wao mkubwa uliofanikisha maandalizi ya msimu wa saba wa mbio hizo.

NBC Dodoma Marathon imeendelea kujijengea hadhi kama moja ya matukio makubwa zaidi ya michezo na hisani nchini, ikiunganisha afya, utalii, biashara na maendeleo ya jamii. Kwa ushiriki wa zaidi ya wakimbiaji 13,000 na uongozi wa Waziri Mkuu, toleo la mwaka 2026 linatarajiwa kuweka rekodi nyingine katika historia ya mbio hizo.

---

Endelea kufuatilia Kitomari Banking & Finance Blog kwa habari za uhakika, uchambuzi wa kina na taarifa za wakati kuhusu sekta za benki, biashara, uwekezaji, uchumi na matukio makubwa yanayoendelea Tanzania.