Zanzibar, 6 Agosti 2025 — Katika hatua ya kihistoria ya kisera, Serikali ya Mapinduzi ya Zanzibar (SMZ) imeidhinisha rasmi uzinduzi wa huduma za usafiri wa mtandaoni visiwani humo, hatua iliyowezesha kampuni ya Bolt kuanza shughuli zake wiki hii. Uamuzi huu umefungua ukurasa mpya wa usafiri wa kisasa unaoendeshwa kwa teknolojia katika visiwa vya Zanzibar.
Kwa mujibu wa Bolt, ambayo inatoa huduma katika zaidi ya nchi 50 na miji 600 duniani, uwepo wake Zanzibar unamaanisha kuwapatia wasafiri chapa ya usafiri ambayo wageni kutoka mataifa mbalimbali tayari wanaifahamu na kuizoea kutumia wakiwa nyumbani kwao.
Kuchochea Uchumi na Fursa za Ajira
Serikali inatarajia hatua hii itachochea shughuli za kiuchumi kwa kuongeza upatikanaji wa usafiri wa bei nafuu na unaopatikana kwa urahisi. Hatua hiyo pia inalenga kuwahamasisha watalii, wafanyakazi wa kigeni, na wakazi kutoka Tanzania Bara kutumia zaidi huduma na bidhaa za ndani.
Ujio wa Bolt unatarajiwa kuleta faida kubwa za kijamii na kiuchumi — kuanzia ajira kwa vijana, ujasiriamali wa kidijitali, hadi kuongeza usalama na ufanisi wa usafiri kwa wakazi na wageni.
Kama jukwaa linaloaminika kimataifa, Bolt pia itaimarisha uthabiti wa huduma za usafiri hasa wakati wa msimu wa juu wa utalii, jambo litakalonufaisha biashara ndogo ndogo na sekta ya huduma Zanzibar.
Kauli ya Bolt Tanzania
“Tunapongeza uamuzi wa kishujaa na wa kisasa wa Serikali kuikubali huduma ya ride-hailing kama chombo cha kuchochea uchumi na kukuza maendeleo jumuishi,” alisema Dimmy Kanyankole, Meneja Mkuu wa Bolt Tanzania.
“Hatua hii ni uthibitisho wa imani kubwa kwa rekodi ya Bolt, na tunajivunia kuleta jukwaa letu kusaidia kufanikisha maono ya kiuchumi ya Zanzibar. Ushirikiano wetu wa kisera na ZARTASA umezaa matunda na kufungua njia ya kuwepo kwa mfumo wa udhibiti wa pamoja unaounga mkono ubunifu, ajira kwa vijana, na maboresho ya huduma za usafiri kwa wote,” aliongeza.
Utalii Wazidi Kua Zanzibar
Haja ya mabadiliko haya imekuwa kubwa zaidi mwaka huu, huku Zanzibar ikiendelea kujenga mfumo wa usafiri wa kisasa na unaodhibitiwa kisheria.
Kwa mujibu wa Tume ya Utalii Zanzibar, mwezi Julai pekee visiwa hivyo vilipokea zaidi ya wageni 106,000 kutoka nje ya nchi — idadi kubwa zaidi kuwahi kurekodiwa kwa mwezi mmoja. Tangu Januari, watalii waliowasili Zanzibar wamefikia karibu nusu milioni, hali inayoashiria fursa kubwa kwa sekta ya usafiri kushirikiana na sekta binafsi ili kuongeza manufaa kwa wenyeji na wageni.
💡 Kitomari Banking & Finance Blog itaendelea kukuletea habari na uchambuzi wa maendeleo ya sekta za uchumi, biashara, na teknolojia Tanzania na Afrika Mashariki.
No comments:
Post a Comment