VODACOM YADUMISHA USHIRIKIANO NA JAMII KUPITIA MASHINDANO YA GOLF YA CORPORATE MASTERS

Mkuu wa Idara ya Masoko na Ushirikiano wa Vodacom Tanzania, Joseph Sayi (wa pili kushoto), akimkabidhi tuzo ya "Longest Drive" Bw. Ali Mamdouhi (wa pili kulia). Tukio hilo lilifanyika hive karibuni wakati wa hafla ya ugawaji wa tuzo iliyoandaliwa na Vodacom Tanzania jijini Dar es Salaam.

Dar es Salaam, 2 Agosti 2025 – Kampuni ya Vodacom Tanzania, kupitia kitengo chake cha Vodacom Business kinachohudumia wafanyabiashara wakubwa na wadau wa sekta mbalimbali, imekabidhi zawadi na tuzo kwa washindi wa mashindano ya Vodacom Corporate Masters Golf, yaliyofanyika katika uwanja wa TPDF Lugalo jijini Dar es Salaam.

Tukio hilo la kipekee lililenga kuhamasisha ushiriki wa wadau kutoka sekta mbalimbali katika michezo ya kijamii, likiwa sehemu ya mkakati wa Vodacom wa kuendeleza vipaji, kukuza afya ya jamii na kudumisha mahusiano ya karibu na wadau wake.

Tuzo na zawadi mbalimbali zilitolewa kwa washiriki kutoka makundi tofauti ikiwa ni pamoja na watoto wa kike na wa kiume, wanawake, wanaume, pamoja na wachezaji waliobobea kutoka mashirika mbalimbali. Mashindano hayo yalijumuisha wawakilishi wa sekta za fedha, mawasiliano, uzalishaji, pamoja na taasisi nyingine za kibiashara.

“Kupitia Vodacom Corporate Masters, tunaimarisha uhusiano wetu na wadau wetu huku tukichangia maendeleo ya michezo na afya ya jamii,” ilisema sehemu ya taarifa kutoka Vodacom.

Tukio hili linaendana na dhamira ya muda mrefu ya Vodacom ya kuunga mkono maendeleo ya michezo nchini, hasa kwa kuhakikisha michezo kama golf inafikika kwa watu kutoka makundi mbalimbali ya kijamii.

Mashindano ya mwaka huu yameongeza ari ya ushiriki wa mashirika katika michezo ya kijamii, na kusaidia kukuza vipaji vipya miongoni mwa vijana na watu wazima.

---

Endelea kufuatilia Kitomari Banking & Finance Blog kwa taarifa zaidi kuhusu ushiriki wa taasisi za kifedha na kibiashara katika maendeleo ya jamii kupitia michezo na miradi endelevu.