NMB, MANTRAC WAFUNGUA UFADHILI WA MITAMBO KWA WACHIMBAJI NA WAKANDARASI

Afisa Mkuu wa Wateja Binafsi na Biashara wa NMB, Filbert Mponzi (kushoto), na Mkurugenzi wa Biashara na Uendeshaji wa Mantrac Kanda ya Afrika Mashariki, Levite Dongmo, wakipeana mkono baada ya kubadilishana Hati ya Makubaliano ya Ushirikiano wa ufadhili wa mitambo, jijini Dar es Salaam.

Wachimbaji, Wakandarasi Kunufaika na Mpango Mpya wa Ufadhili wa Mitambo

DAR ES SALAAM – Benki ya NMB Plc na Mantrac Tanzania Limited zimeingia katika ushirikiano wa kimkakati utakaorahisisha upatikanaji wa mikopo ya kununua na kuhudumia mitambo kwa wachimbaji, wakandarasi na wafanyabiashara wanaofanya shughuli katika sekta za madini, ujenzi, miundombinu, nishati na viwanda.

Makubaliano hayo yanachanganya uwezo wa kifedha wa NMB, benki yenye mtandao wa zaidi ya matawi 250 nchini, na uzoefu wa Mantrac Tanzania katika usambazaji wa mitambo ya Caterpillar pamoja na huduma za matengenezo na msaada wa kiufundi, hatua inayotarajiwa kuongeza upatikanaji wa mitaji kwa miradi mikubwa ya maendeleo.

Hati ya Makubaliano ya Ushirikiano ilisainiwa jijini Dar es Salaam na Afisa Mkuu wa Wateja Binafsi na Biashara wa NMB, Filbert Mponzi, pamoja na Mkurugenzi wa Biashara na Uendeshaji wa Mantrac Kanda ya Afrika Mashariki, Levite Dongmo.

Ufadhili wa Mitambo kwa Masharti Rafiki

Kupitia mpango huo, wateja watakaokidhi vigezo vya mkopo wataweza kufadhili ununuzi wa mitambo kwa kuchangia asilimia 20 hadi 25 ya gharama za awali, huku NMB ikiandaa mifumo ya ufadhili na ratiba za marejesho kulingana na mtiririko wa fedha, aina ya biashara na mahitaji ya mradi husika.

Akizungumza wakati wa utiaji saini, Mponzi alisema gharama kubwa za ununuzi wa mitambo zimekuwa changamoto kwa wafanyabiashara wengi wenye miradi yenye tija, lakini wasiokuwa na mtaji wa kutosha.

"Tunapofadhili mitambo, hatufadhili mashine pekee. Tunawezesha ujenzi wa barabara, migodi, viwanda, ajira na uwezo wa Tanzania kujenga mustakabali wake wa kiuchumi," alisema.

Aliongeza kuwa NMB hutoa mikopo yenye thamani ya zaidi ya Shilingi bilioni 200 kila mwezi kwa wafanyabiashara na wajasiriamali, huku ushirikiano huo ukitarajiwa kuongeza uwezo wa benki kutoa suluhisho maalumu la kifedha kwa sekta za uchimbaji madini na ujenzi.

Zaidi ya Mkopo, Wateja Kupata Huduma Kamili

Kwa mujibu wa makubaliano hayo, NMB itakuwa na jukumu la kufanya tathmini za mikopo na kuandaa masharti ya ufadhili, wakati Mantrac itahakikisha upatikanaji wa mitambo, huduma baada ya mauzo, matengenezo yaliyoidhinishwa na mtengenezaji pamoja na msaada wa kiufundi.

Mitambo itakayofadhiliwa itakuwa na dhamana ya kati ya miezi 24 hadi 36, kulingana na aina ya kifaa, matumizi yake na masharti ya ufadhili yatakayokubaliwa.

Mponzi alisema mfumo huo umeundwa kuhakikisha mteja hapati fedha pekee bali pia anapata suluhisho kamili litakalomsaidia kuendesha biashara kwa ufanisi na kuongeza tija.

"Mitambo inapofanya kazi kwa uhakika, miradi inakamilika kwa wakati, gharama zinadhibitiwa na uwezo wa mteja kurejesha mkopo unalindwa," alisisitiza.

Kuchochea Ukuaji wa Sekta Muhimu za Uchumi

Kwa upande wake, Dongmo alisema ushirikiano huo utaongeza uwezo wa wafanyabiashara kupata mitambo ya kisasa pamoja na huduma za kitaalamu zitakazowawezesha kuongeza uzalishaji na kupanua shughuli zao.

"Uwezeshaji wa kifedha kutoka NMB ukiunganishwa na upatikanaji wa mitambo, mashine, majenereta na huduma za kiufundi kutoka Mantrac utaongeza uwekezaji na kuchochea ukuaji wa sekta muhimu za uchumi,"alisema.

Aliongeza kuwa ushirikiano huo utafungua fursa mpya kwa wachimbaji, wakandarasi na wawekezaji wanaohitaji teknolojia ya kisasa ili kuongeza ufanisi wa shughuli zao.

Hatua Muhimu kwa Ukuaji wa Uchumi

Utekelezaji wa mpango huo unatarajiwa kuongeza uwezo wa wachimbaji na wakandarasi kumiliki mitambo ya kisasa, kupunguza kusimama kwa miradi kutokana na hitilafu za mashine na kuhakikisha utekelezaji wa miradi unafanyika kwa wakati.

Mpango huo pia unatarajiwa kuchangia ukuaji wa sekta za madini, ujenzi, miundombinu, nishati na viwanda, ambazo ni nguzo muhimu katika maendeleo ya uchumi wa Tanzania.

---

Endelea kufuatilia Kitomari Banking & Finance Blog kwa habari za uhakika, uchambuzi wa kina na taarifa za hivi karibuni kuhusu sekta za benki, fedha, biashara, uwekezaji na maendeleo ya uchumi nchini Tanzania.