KCB BANK TANZANIA YAANDAA HAFLA YA IFTAR ZANZIBAR KUIMARISHA USHIRIKIANO NA JAMII

Waziri wa Fedha na Mipango wa Serikali ya Mapinduzi ya Zanzibar, Mhe. Dkt. Juma Malik Akil (kulia), akishiriki katika Iftar iliyoandaliwa na KCB Bank katika Hoteli ya Golden Tulip, Zanzibar, yenye lengo la kuimarisha mshikamano na wateja wake pamoja na wadau wa maendeleo katika mwezi mtukufu wa Ramadhani. Kushoto ni Sheikh Khamis Mataka, Mwenyekiti wa Bodi ya Ushauri ya Shariah KCB SAHL.

Zanzibar – Machi 5, 2026: KCB Bank Tanzania imeandaa hafla maalumu ya Iftar katika hoteli ya Golden Tulip, Zanzibar, yenye lengo la kuimarisha mshikamano na wateja pamoja na wadau wa maendeleo katika msimu huu mtukufu wa Ramadhani.

Hafla hiyo ilihudhuriwa na Mgeni Rasmi, Mhe. Dkt. Juma Malik Akil, Waziri wa Fedha na Mipango wa Serikali ya Mapinduzi ya Zanzibar.

Akizungumza kwenye hafla hiyo, Sheikh Khamis Mataka, Mwenyekiti wa Bodi ya Shariah ya KCB Bank Tanzania, alisisitiza umuhimu wa kufanya biashara kwa uadilifu, uwazi, na misingi ya kumcha Mungu—nguzo kuu ya huduma za Sahl Banking.

Mataka alifafanua huduma mbalimbali zinazotolewa na Sahl Banking, ikiwa ni pamoja na:

• Murabaha – ufadhili wa faida badala ya riba
• Qard Hasan – mikopo ya muda mfupi isiyo na riba
• Akaunti maalum za Hijja na akiba

Aidha, alibainisha juhudi za benki katika uwezeshaji wa vijana kupitia programu ya 2Jiajiri, inayowapa mafunzo ya ujasiriamali na ujuzi wa kiuchumi, pamoja na msaada kwa nyumba za watoto yatima visiwani Zanzibar.

Kwa upande wake, Mgeni Rasmi Mhe. Dkt. Juma Malik Akil aliipongeza KCB Bank Tanzania kwa nafasi yake kama daraja kati ya mfumo wa kibenki wa kawaida na mahitaji ya kimaadili ya jamii ya Zanzibar. Alisisitiza umuhimu wa benki kuendelea kubuni bidhaa zinazounga mkono dira ya serikali ya kuwa na uchumi wa kidijitali na jumuishi.

Hafla ya Iftar iliwakutanisha viongozi wa serikali, viongozi wa dini, na jumuiya ya wafanyabiashara, huku ikilenga kuimarisha mshikamano kati ya KCB Bank na jamii katika mwezi mtukufu wa Ramadhani.