VODACOM YAENDELEA KUDHAMINI MASHINDANO YA "VODACOM TANZANIA OPEN 2025"

Dar es Salaam, 23 Septemba 2025 – Vodacom Tanzania Plc, kwa kushirikiana na Chama cha Gofu Tanzania (TGU), imetangaza kuwa mdhamini mkuu wa mashindano ya Vodacom Tanzania Open 2025, yanayotarajiwa kuvutia zaidi ya wachezaji 150 kutoka Tanzania na nchi za Afrika Mashariki na Kusini.

Ushirikiano huu ni sehemu ya mkakati wa Vodacom wa kuendeleza mchezo wa gofu nchini, huku kampuni hiyo ikiadhimisha miaka 25 ya huduma zake. Lengo kuu ni kujikita kama mtandao namba moja unaounga mkono maendeleo ya gofu Tanzania, hususan jijini Dar es Salaam na visiwani Zanzibar.

Mashindano ya Tanzania Open siyo tu uwanja wa mashindano, bali pia ni jukwaa la kuonyesha vipaji, mshikamano wa michezo na ubunifu wa kidijitali. Kupitia ubia huu, Vodacom inaleta mapinduzi katika mchezo wa gofu kwa kuunganisha urithi wake na teknolojia ya kisasa, sambamba na kukuza ushiriki wa jamii na ujumuishi kwenye michezo.

Kauli za Viongozi

Akizungumza katika hafla ya uzinduzi, Mkuu wa Idara ya Masoko na Uwezeshaji wa Vodacom Business, Joseph Sayi, alisema:

“Ushirikiano wetu na Tanzania Open unaonyesha dhamira ya Vodacom katika kukuza michezo nchini huku tukidhihirisha namna teknolojia inavyoweza kuboresha maisha ya wananchi hata kupitia michezo. Kuanzia huduma za mtandao hadi malipo kupitia M-Pesa, tunahakikisha kila mmoja anapata uzoefu wa kipekee ndani na nje ya uwanja.”

Kwa upande wake, Mwenyekiti wa Chama cha Gofu Tanzania, Gilman Kasiga, alibainisha:

“Mashindano ya Vodacom Tanzania Open 2025 ni tukio la kihistoria kwa mchezo wa gofu na taifa letu. Kwa mwaka wa tatu mfululizo, Vodacom imeendelea kuwa bega kwa bega nasi kama mdhamini mkuu, jambo linalodhihirisha dhamira yao ya kukuza michezo na vipaji nchini. Tunajivunia kuona vijana, wanawake na chipukizi wakishiriki kwa pamoja—ishara ya dhati ya TGU katika kukuza ushirikishwaji na maendeleo endelevu ya mchezo huu.”

Kasiga aliongeza kuwa mashindano haya yana ubora wa kimataifa na ni fursa kubwa kwa utalii, uwekezaji, ajira na nafasi nyingine za kijamii na kiuchumi nchini Tanzania.

Akihitimisha, Joseph Sayi alisisitiza:

“Vodacom Tanzania Open ni mfano halisi wa kuunganisha urithi wa michezo na ubunifu wa teknolojia ya kisasa. Ushirikiano wetu na TGU unaimarisha nafasi ya Tanzania kwenye ramani ya gofu ya kikanda na kusukuma mbele dhamira ya Vodacom ya jamii iliyounganishwa kidijitali.”