NBC DODOMA MARATHON 2025 YAVUNJA REKODI, ZAIDI YA 12,000 WASHIRIKI, MILIONI 700 ZAKUSANYWA

Naibu Waziri Mkuu, Dkt. Dotto Biteko (wa pili kushoto), akimkabidhi mfano wa hundi yenye thamani ya Tsh milioni 100 Mkurugenzi Mtendaji wa Taasisi ya Saratani Ocean Road, Dkt. Diwani Msemo (wa tatu kulia). Hundi hiyo ilitolewa na Benki ya NBC kwa ajili ya kuchangia mapambano dhidi ya saratani ya shingo ya kizazi kwa wanawake, kupitia mbio za NBC Dodoma Marathon zilizofanyika leo katika Uwanja wa Jamhuri jijini Dodoma.

Wanaoshuhudia tukio hilo ni pamoja na Waziri wa Utamaduni, Sanaa na Michezo, Prof. Paramagamba Kabudi (kushoto), Mkurugenzi Mtendaji wa Benki ya NBC, Bw. Theobald Sabi (wa pili kulia), Gavana wa Benki Kuu ya Tanzania, Bw. Emmanuel Tutuba (kulia), pamoja na viongozi wengine wa serikali na wadau wa mbio hizo.

Dodoma, Julai 27, 2025 – Historia mpya iliandikwa leo katika Jiji la Dodoma baada ya Naibu Waziri Mkuu, Dkt. Dotto Biteko kuwaongoza washiriki zaidi ya 12,000 katika mbio za NBC Dodoma Marathon 2025, zilizoandaliwa na Benki ya Taifa ya Biashara (NBC). Mbio hizo zilizofanyika katika Uwanja wa Jamhuri zilikusanya zaidi ya shilingi milioni 700 kwa ajili ya kusaidia afya ya mama na mtoto nchini.

Katika tukio hilo lililovutia washiriki kutoka ndani na nje ya nchi – wakiwemo kutoka Tanzania, Kenya na Uganda – mbio hizo zilijumuisha mashindano ya kilomita 5, 10, 21 na 42 huku viongozi mbalimbali wa kitaifa wakishiriki kwa karibu.

Dkt. Biteko: Mazoezi Sio Hiyari, Ni Hitaji la Lazima

Akizungumza kwenye hafla ya utoaji zawadi, Dkt. Biteko alipongeza NBC kwa kuongeza hamasa ya ushiriki kutoka washiriki 1,500 mwaka 2020 hadi 12,000 mwaka huu. Alisema mafanikio haya yanadhihirisha mwamko wa Watanzania kuhusu umuhimu wa mazoezi, hasa katika kukabiliana na magonjwa yasiyoambukiza kama shinikizo la damu, kisukari na magonjwa ya moyo.

“Takwimu zinaonyesha asilimia 33 ya Watanzania wanakabiliwa na uzito uliozidi kiwango na asilimia 28 wana shinikizo la damu. Mazoezi si hiyari tena – ni hitaji la lazima kwa afya ya binadamu,” alisema.

Dkt. Biteko pia aliuomba uongozi wa Mkoa wa Dodoma kutangaza rasmi NBC Dodoma Marathon kuwa kivutio cha utalii na kichocheo cha uchumi kwa mkoa huo.

Prof. Kabudi: NBC Dodoma Marathon Ni Kiwango cha Kimataifa

Naye Waziri wa Utamaduni, Sanaa na Michezo, Prof. Paramagamba Kabudi, aliisifu NBC kwa uwekezaji wake katika sekta ya michezo. Alisema ukubwa wa mashindano haya unapaswa kutumika kama jukwaa la kuibua vipaji vya kushiriki katika mashindano ya Olympics na Jumuiya ya Madola.

NBC Yaelekeza Milioni 400 kwa Miradi ya Kijamii

Mkurugenzi Mtendaji wa NBC, Bw. Theobald Sabi, alieleza kuwa kati ya fedha zilizokusanywa:

• Tsh Milioni 400 zitaelekezwa kufanikisha malengo ya mbio hizo ikiwa ni pamoja na:
• Mapambano dhidi ya saratani ya shingo ya kizazi
• Ufadhili wa wakunga 200 nchini
• Masomo kwa wauguzi 100 wanaowahudumia watoto wenye changamoto za usonji (autism)

Katika hafla hiyo, hundi za msaada zilitolewa kama ifuatavyo:

• Milioni 200 kwa Taasisi ya Benjamin Mkapa
• Milioni 100 kwa Taasisi ya Ocean Road
• Milioni 100 kwa AMREF Health Africa

Matokeo ya Mashindano: Kenya na Tanzania Watinga Juu

Mbio za KM 42 (Full Marathon)

Wanaume

• 🥇 Moses Mengich (Kenya) – 2:12:56
• 🥈 Kipyeko Naman (Kenya) – 2:13:25

Wanawake

• 🥇 Joy Kemuma (Kenya) – 2:31:57
• 🥈 Jacinta Chepkoech (Kenya) – 2:33:56

Zawadi: Washindi wa kwanza waliondoka na Tsh Milioni 11.5, wa pili Tsh Milioni 5 na vocha za manunuzi.

Mbio za KM 21 (Half Marathon)

Wanaume

• 🥇 Felix Simbu (Tanzania) – 1:32:45
• 🥈 Boay Maganga (Tanzania) – 1:33:25

Wanawake

• 🥇 Hamida Mussa (Tanzania) – 1:48:52
• 🥈 Judith Cherono – 1:49:00

Zawadi: Washindi wa kwanza walipata Tsh Milioni 5.5, wa pili Tsh Milioni 2.5.

Mbali na fedha taslimu, washindi walipokea vocha za manunuzi kutoka kwa wadhamini akiwemo GSM Group na kampuni ya Sketchers.

Dhamira ya NBC: Kutumikia Jamii Zaidi ya Kibenki

Bw. Sabi alihitimisha kwa kusema kuwa mafanikio haya ni matokeo ya dhamira ya NBC kusaidia jamii zaidi ya huduma za kifedha. Alitoa shukrani kwa wadhamini wote waliowezesha mbio hizo, akiwemo GSM Group, Sanlam Bima, na wengine.

---

NBC Dodoma Marathon 2025 imethibitisha si tu kuwa tukio kubwa la michezo, bali pia jukwaa la kubadilisha maisha na kuchochea maendeleo ya jamii kupitia michezo.

---

👉 Endelea kufuatilia blogu yetu kwa habari zaidi kuhusu michezo, afya, maendeleo ya jamii na matukio makubwa kutoka Tanzania na Afrika Mashariki.

Naibu Waziri Mkuu, Dkt. Dotto Biteko (wa pili kushoto), akizungumza na Mkurugenzi Mkazi wa Amref Health Africa Tanzania, Dkt. Florence Temu (katikati), mara baada ya kumkabidhi mfano wa hundi yenye thamani ya Tsh milioni 100 iliyotolewa na Benki ya NBC kwa ajili ya kusaidia kuanzisha mpango mpya wa kufadhili masomo ya wauguzi 100 wanaowahudumia watoto wenye changamoto za usonji (autism) nchini. Hundi hiyo ilitolewa kupitia mbio za NBC Dodoma Marathon zilizofanyika leo katika Uwanja wa Jamhuri jijini Dodoma.

Naibu Waziri Mkuu, Dkt. Doto Biteko (wa tatu kushoto), akimkabidhi mfano wa hundi yenye thamani ya Shilingi milioni 200 kwa mwakilishi wa Taasisi ya Benjamin Mkapa Foundation. Hundi hiyo imetolewa na Benki ya NBC kwa ajili ya kupanua ufadhili wa wakunga hadi kufikia wakunga 200, kupitia mbio za NBC Dodoma Marathon zilizofanyika leo katika Uwanja wa Jamhuri jijini Dodoma. Wanaoshuhudia tukio hilo ni pamoja na Waziri wa Elimu, Sayansi na Teknolojia, Mhe. Prof. Adolf Mkenda (kushoto); Waziri wa Utamaduni, Sanaa na Michezo, Prof. Paramagamba Kabudi (wa pili kushoto); Mkurugenzi Mtendaji wa Benki ya NBC, Bw. Theobald Sabi (wa tatu kulia); pamoja na viongozi wengine kutoka serikalini na wadau wa mbio hizo.

Naibu Waziri Mkuu Dkt Dotto Biteko (wa pili kushoto) akikabidhi mfano wa hundi yenye thamani ya sh mil 5.5 kwa mwanariadha wa kimataifa kutoka Tanzania, Alphonce Simbu alieibuka mshindi wa kwanza (kwa upande wa wanaume) wa mbio za km 21 za NBC Dodoma Marathon, zilizofanyika leo kwenye Uwanja wa Jamhuri jijini Dodoma. 

Mkurugenzi wa Uwekezaji wa Kampuni ya GSM Group, Mhandisi Hersi Said, akizungumza wakati wa hafla ya kukabidhi zawadi kwa washindi wa mbio hizo. Kampuni ya GSM Group ndiyo mdhamini mkuu wa mbio hizo.

Mkurugenzi wa Fedha wa Kampuni ya Bima ya Sanlam Insurance, Bw. Mika Samwel, akizungumza wakati wa hafla ya kukabidhi zawadi kwa washindi wa mbio hizo. Kampuni ya Bima ya Sanlam Insurance ni miongoni mwa wadhamini muhimu wa mbio hizo.