UNDP YAWAPATIA WANAFUNZI WAJASIRIAMALI 20, SH. 70 MIL. KUPITIA YOUTH IGNITE FELLOWSHIP

Dkt. Harun Makandi, Mkurugenzi Msaidizi wa Sayansi na Teknolojia kutoka Wizara ya Elimu, Sayansi na Teknolojia (wa tatu kushoto), akimkabidhi Bi. Herriet Nairumbe, Mwanzilishi wa Niches Food Products yenye makao yake Arusha na mshindi wa nafasi ya kwanza wa Youth Ignite Student Founders Fellowship – Msimu wa Pili, mfano wa hundi. Wanaoshuhudia tukio hilo upande wa kushoto ni John Rutere, Naibu Mwakilishi Mkazi wa UNDP Tanzania, na Bi. Shakila Mshana, Mwanzilishi Mwenza na Mkurugenzi Mtendaji wa StartHub Africa. Upande wa kulia kabisa ni Bi. Sanna-Liisa Taivalmaa, Mkuu wa Ushirikiano katika Ubalozi wa Finland, na Joseph Manirakiza, Meneja wa Programu ya FUNGUO, UNDP Tanzania.

John Rutere, Naibu Mwakilishi Mkazi wa UNDP Tanzania, akitoa pongezi wakati wa hafla ya kukabidhi vyeti kwa mmoja wa washindi wakuu wa Youth Ignite Student Founders Fellowship – Msimu wa Pili, iliyofanyika Dar es Salaam mwishoni mwa wiki. Wanaoshuhudia tukio hilo upande wa kulia ni Dkt. Harun Makandi, Mkurugenzi Msaidizi wa Sayansi na Teknolojia kutoka Wizara ya Elimu, Sayansi na Teknolojia, pamoja na Joseph Manirakiza, Meneja wa Programu ya FUNGUO, UNDP Tanzania.

Dar es Salaam, Januari 30, 2026 – Shirika la Umoja wa Mataifa la Mpango wa Maendeleo (UNDP) nchini Tanzania limewapatia wanafunzi wajasiriamali 20 kutoka vyuo vikuu mbalimbali zawadi za fedha taslimu zenye thamani ya zaidi ya Shilingi milioni 70, kufuatia shindano la uwasilishaji wa mawazo bunifu ya biashara lililoandaliwa chini ya Awamu ya Pili ya programu ya Youth Ignite Student Founders Fellowship.

Programu hiyo inatekelezwa kupitia Programu ya FUNGUO ya UNDP Tanzania, kwa ufadhili wa pamoja wa Serikali ya Uingereza kupitia Ofisi ya Mambo ya Nje, Jumuiya ya Madola na Maendeleo (FCDO), Umoja wa Ulaya (EU), pamoja na Serikali ya Finland.

Kukuza Ubunifu na Ujasiriamali wa Vijana

Hafla hiyo iliwakutanisha wanafunzi 30 kutoka taasisi mbalimbali za elimu ya juu nchini, waliowasilisha mawazo yao ya biashara mbele ya jopo la majaji. Mawazo hayo yalilenga kutoa suluhisho bunifu kwa changamoto za kijamii na kiuchumi, hatua inayoonesha ukuaji wa ubunifu na ujasiriamali miongoni mwa vijana wa Kitanzania.

Mbali na tuzo za fedha, washiriki wa programu walipatiwa msaada wa kitaalamu ikiwemo mafunzo ya maendeleo ya biashara, ushauri elekezi (mentorship), pamoja na maandalizi ya kuwafanya wawe tayari kuvutia wawekezaji.

Serikali Yapongeza Ushirikiano

Mgeni rasmi wa hafla hiyo, Dkt. Harun Makandi, Mkurugenzi Msaidizi wa Sayansi na Teknolojia kutoka Wizara ya Elimu, Sayansi na Teknolojia, alisema programu hiyo inaendana kikamilifu na ajenda ya Serikali ya kukuza utafiti wenye tija kibiashara, ubunifu na ujasiriamali miongoni mwa vijana.

“Mpango huu unaunga mkono jitihada za serikali za kulea kizazi kipya cha wabunifu na wazalishaji wa ajira kutoka taasisi zetu za elimu ya juu. Unaakisi mwelekeo wa Tanzania wa kuunganisha sayansi, teknolojia na ujasiriamali katika maendeleo ya taifa,” alisema Dkt. Makandi.

UNDP: Vijana ni Msingi wa Dira 2050

Akizungumza katika hotuba kuu, John Rutere, Naibu Mwakilishi Mkazi wa UNDP Tanzania, alibainisha kuwa programu hiyo ni sehemu ya mkakati mpana wa kusaidia utekelezaji wa Dira ya Maendeleo ya Tanzania 2050, inayolenga kuifanya Tanzania kuwa nchi ya kipato cha kati cha juu ifikapo mwaka 2050.

“Kufikia uchumi wa thamani ya Dola za Marekani trilioni moja kunahitaji uwekezaji wa makusudi kwa vijana na biashara zao. Youth Ignite Student Founders Fellowship ni mfano halisi wa miradi inayowawezesha vijana kwa ujuzi, mitandao ya wawekezaji na mitaji muhimu kwa ukuaji wa biashara zenye athari kubwa kiuchumi,” alisema Rutere.

Washirika wa Maendeleo Wasisitiza Ajira Jumuishi

Kwa upande wake, Bw. Euan Davidson, Kiongozi wa Timu ya Miradi Endelevu kutoka FCDO, alisisitiza umuhimu wa kuwekeza katika biashara zinazoongozwa na vijana kama njia ya kuchochea ukuaji wa uchumi jumuishi.

Westerwelle Foundation Tanzania na StartHub Africa walitoa mchango wao kwa kutoa mafunzo ya vitendo katika uandaaji wa mipango ya biashara na uwasilishaji wa mawazo (pitching), ili kuwaandaa washiriki kuvutia wawekezaji.

Naye Bi. Sanna-Liisa Taivalmaa, Mkuu wa Ushirikiano kutoka Ubalozi wa Finland, alithibitisha dhamira ya Finland kuendelea kuunga mkono mifumo ya ubunifu na ujasiriamali wa vijana nchini Tanzania.

Washindi Wapata Shilingi Milioni 6 Kila Mmoja

Miongoni mwa washindi waliofanya vizuri zaidi, kila mmoja alipokea Shilingi milioni 6 kwa ajili ya kukuza biashara zao.

Herriet Nairumbe, Mwanzilishi wa Niches Food Products kutoka Arusha, inayojishughulisha na uongezaji thamani wa pilipili na matunda, alisema fedha hizo zitasaidia kuongeza uzalishaji na kupanua masoko.

“Fedha hizi zitanunua mashine zitakazoongeza tija na kutuwezesha kufikia masoko mapya ya mikoa mingine,” alisema Herriet, akiongeza kuwa programu hiyo imewasaidia kuimarisha ujuzi wa uhasibu, upangaji wa bei, ujenzi wa timu na huduma kwa wateja.

Mshindi mwingine, Irene George Ngatibigwa, Mwanzilishi Mwenza wa Eco Mushroom, alisema ufadhili huo utasaidia kuongeza uwezo wa uzalishaji wa bidhaa za uyoga na kuajiri vijana zaidi.

“Kupitia mafunzo ya Youth Ignite, nimejifunza masoko, uwasilishaji kwa wawekezaji na ujenzi wa mitandao ya kibiashara. Ujuzi huu ni msingi wa ukuaji wa biashara yetu,” alisema Irene.

Kujenga Biashara za Kesho

Kupitia mafunzo, ushauri elekezi na msaada wa kifedha, Youth Ignite Student Founders Fellowship inaendelea kujenga kizazi cha wajasiriamali vijana wenye biashara zenye uwezo wa kukua na kuchangia katika mabadiliko ya kiuchumi ya Tanzania.

Washindi wa awamu hii wanawakilisha sekta mbalimbali zikiwemo teknolojia, kilimo-biashara, mabadiliko ya tabianchi, uzalishaji viwandani na ubunifu wa kijamii — ishara ya upana na ubora wa mawazo bunifu yanayotoka katika taasisi za elimu ya juu nchini.

Kupitia Programu ya FUNGUO, UNDP na washirika wake wanaendelea kuondoa vikwazo katika mfumo wa ubunifu nchini kwa kuwezesha upatikanaji wa ufadhili, ujuzi na mitandao, ili biashara changa ziweze kukua, kustawi na kuleta athari chanya endelevu kwa uchumi wa taifa.

Dkt. Harun Makandi, Mkurugenzi Msaidizi wa Sayansi na Teknolojia kutoka Wizara ya Elimu, Sayansi na Teknolojia (wa pili kushoto), akimkabidhi mfano wa hundi mshindi wa nafasi ya pili wa Youth Ignite Student Founders Fellowship – Msimu wa Pili, iliyofanyika Dar es Salaam mwishoni mwa wiki. Wanaoshuhudia tukio hilo upande wa kushoto ni John Rutere, Naibu Mwakilishi Mkazi wa UNDP Tanzania, huku upande wa kulia kabisa wakiwa Bi. Sanna-Liisa Taivalmaa, Mkuu wa Ushirikiano katika Ubalozi wa Finland, pamoja na Joseph Manirakiza, Meneja wa Programu ya FUNGUO, UNDP Tanzania.