BENKI YA EXIM YAWEKEZA KATIKA UONGOZI WA WANAWAKE KUPITIA MAFUNZO YA ‘MINDFUL LEADERSHIP’

Meneja Mkuu wa Masoko na Mawasiliano wa Benki ya Exim, Kauthar D’souza, akizungumza na wanawake walioshiriki mafunzo ya ‘Mindful Leadership’ yaliyofanyika kwa ushirikiano na Mind Matters, yenye lengo la kuwaendeleza wanawake katika ujasiriamali, kuimarisha uwezo na kutoa fursa sawa kwa wanawake katika kila nyanja za maisha. Mafunzo haya yatafanyika kwa awamu tatu, yakilenga kuwanufaisha wanawake 150. Tukio hili limefanyika mwishoni mwa wiki jijini Dar es Salaam.

Dar es Salaam, 27 Septemba 2025 – Benki ya Exim Tanzania, kupitia Mpango wake wa Kuwawezesha Kiuchumi Wanawake (Women Empowerment Program – WEP) chini ya Exim Cares, imejitokeza kama Mdhamini Mkuu wa mafunzo ya Mindful Leadership Training for Women. Mafunzo haya yatawaleta pamoja viongozi zaidi ya 150 wa kike kutoka sekta mbalimbali za biashara, elimu na huduma za umma, yakilenga kuimarisha uongozi wa kina, akili ya hisia, ustahimilivu na ubunifu.

Mafunzo hayo yanatarajiwa kufanyika kwa awamu tatu – 27 Septemba, 4 Oktoba na 11 Oktoba 2025 – na kila darasa litahusisha mazoezi ya vitendo, nafasi ya kubadilishana mawazo na kupata uzoefu kutoka kwa wataalam wa uongozi.

Kauli za Viongozi

Mkuu wa Idara ya Masoko na Mawasiliano wa Benki ya Exim, Stanley Kafu, alisema:

“Tunafurahia kushirikiana na Mind Matters katika mpango huu muhimu unaolenga kukuza uongozi wa wanawake. Kupitia WEP, tunatoa fursa kwa wanawake kupata ujuzi wa ujasiriamali, ustahimilivu, na uwezo wa kuongoza hisia binafsi, jambo linalowasaidia kustawisha maisha yao, familia zao, na jamii zao kwa ujumla.”

Naye Meneja Mkuu wa Masoko na Mawasiliano wa Benki ya Exim, Kauthar D’souza, aliongeza:

“Usambazaji wa ujuzi huu ni kielelezo cha jitihada zetu za kudumisha usawa wa kijinsia na kuwekeza katika wanawake ili waanzishe mabadiliko chanya. Mpango huu unaungana moja kwa moja na WEP unaolenga kuendeleza ujasiriamali, kuimarisha uwezo na kutoa fursa sawa kwa wanawake katika kila nyanja ya maisha.”

Kwa upande wake, Mkurugenzi Mtendaji na Mwanzilishi wa Mind Matters, Nadia Ahmed, alisema:

“Tunashukuru sana kwa ushirikiano huu na Benki ya Exim. Mafunzo ya Mindful Leadership ni zaidi ya kujenga uongozi; ni kubadilisha maisha ya wanawake, kuongeza ustahimilivu wao na kuimarisha jamii zao. Ushirikiano huu unaleta thamani ya moja kwa moja kwa wanawake zaidi ya 150, na ni hatua kubwa katika kuendeleza uongozi wa wanawake Tanzania.”

Maendeleo Endelevu kwa Wanawake

Mpango wa WEP unalenga kuifikia idadi ya wanawake zaidi ya 600,000 ifikapo mwaka 2028, kupitia mafunzo, mikutano, uwezo wa kuongoza hisia binafsi na mitandao ya kibiashara. Kupitia uwekezaji huu, Benki ya Exim inaendelea kuthibitisha nafasi yake kama kiongozi wa kuunga mkono uwezeshaji wa wanawake na maendeleo endelevu, sambamba na Dira ya Maendeleo ya Tanzania 2050.