ECOBANK YAZINDUA TAWI KARIAKOO KUKUZA BIASHARA NA UPATIKANAJI WA HUDUMA ZA KIFEDHA

Mkurugenzi Mtendaji wa Ecobank Tanzania, Dkt. Charles Asiedu akizungumza na wateja pamoja na wafanyakazi wa benki hiyo wakati wa uzinduzi wa tawi la Ecobank Tanzania eneo la Kariakoo.

Dar es Salaam, Juni 5, 2025 — Ecobank Tanzania imezindua rasmi tawi lake jipya katika eneo la Kariakoo, hatua inayolenga kuongeza upatikanaji wa huduma za kifedha katikati ya kitovu cha biashara nchini. Tawi hilo jipya limefunguliwa rasmi katika makutano ya Mtaa wa Mkunguni na Lumumba, na kupokelewa kwa furaha kubwa na jumuiya ya wafanyabiashara wa Kariakoo.

Mwenyekiti wa Jumuiya ya Wafanyabiashara wa Kariakoo, Severini Joseph Mushi (katikati) akikata utepe kuashiria uzinduzi wa tawi la Ecobank Tanzania eneo la Kariakoo ikiwa ni hatua muhimu ya kusogeza huduma za kifedha karibu na kitovu kikuu cha biashara nchini. Wa kwanza kushoto ni Mkurugenzi Mtendaji wa Ecobank Tanzania, Dkt. Charles Asiedu.

---

Wadau wa Kariakoo Wapokea kwa Moyo Mkubwa

Akizungumza wakati wa hafla ya uzinduzi, Mwenyekiti wa Jumuiya ya Wafanyabiashara wa Kariakoo, Bw. Severini Joseph Mushi, ambaye pia alikuwa mgeni rasmi, alipongeza hatua ya Ecobank kuanzisha tena huduma zake katika eneo hilo muhimu.

“Tawi hili litachochea shughuli za uchumi na kuimarisha maendeleo ya mtu mmoja mmoja na taifa kwa ujumla,” alisema Bw. Mushi.

Mwenyekiti wa Jumuiya ya Wafanyabiashara wa Kariakoo, Severini Joseph Mushi akizungumza wakati wa uzinduzi wa tawi la Ecobank Tanzania eneo la Kariakoo.

---

Dhamira ya Kufikia Biashara Ndogo, za Kati na Kubwa

Kwa upande wake, Mkurugenzi Mtendaji wa Ecobank Tanzania, Dkt. Charles Asiedu, alieleza kuwa uzinduzi huu ni sehemu ya mkakati wa benki hiyo wa kuwasogezea huduma za kisasa, rahisi na salama kwa wajasiriamali wadogo, wa kati na wakubwa.

“Tunataka kuhakikisha kuwa wafanyabiashara wa Kariakoo wanaunganishwa moja kwa moja na masoko mengine ndani ya Afrika kupitia mtandao wetu mpana unaojumuisha zaidi ya nchi 33,” alisema Dkt. Asiedu.

Mkuu wa Kitengo cha Biashara kwa Wateja Wakubwa (Commercial Banking), Joyce Ndyetabura akizungumzia kuhusu huduma zinazotolewa na benki hiyo kwa wadau wateja wa Benki hiyo wakati wa uzinduzi wa tawi la Ecobank Tanzania eneo la Kariakoo.

---

Ubora wa Huduma Wathibitishwa na Tuzo ya Kimataifa

Katika hafla hiyo, Ecobank pia ilitangaza kuwa imetunukiwa tuzo ya "Benki Bora Barani Afrika kwa mwaka 2025" na jarida la kimataifa la Global Finance, uthibitisho wa ufanisi na ubunifu wa huduma zinazotolewa.

Mkuu wa Kitengo cha Masoko na Mawasiliano Ecobank Tanzania, Furaha Samalu akitoa neno la ukaribisho wakati wa uzinduzi wa tawi la Ecobank Tanzania eneo la Kariakoo.

---

Huduma Zitakazopatikana katika Tawi la Kariakoo

Wateja wataweza kufurahia huduma mbalimbali katika tawi hilo jipya, zikiwemo:

• Kufungua akaunti za binafsi na za kibiashara
• Kupata mikopo ya biashara
• Malipo ya kielektroniki ya haraka na salama
• Uhamisho wa fedha ndani na nje ya nchi
• Kubadili fedha za kigeni

Tawi litakuwa wazi kila siku za kazi kuanzia saa 2:30 asubuhi hadi 12:00 jioni, na siku za Jumamosi kuanzia saa 2:30 hadi 10:00 jioni.

---

Mpango wa Upanuzi na Ujumuishaji wa Kifedha

Kwa sasa, Ecobank Tanzania ina matawi, ATM na mawakala katika mikoa ya Dar es Salaam, Arusha na Mwanza, huku ikiendelea na juhudi za kufikia Watanzania wengi zaidi — hususan wale walioko nje ya mfumo rasmi wa kifedha.

Kwa uzinduzi huu wa Kariakoo, Ecobank imeonyesha tena dhamira yake ya kuchochea ujumuishaji wa kifedha, kuimarisha biashara ndogo na kati, na kuunganisha Watanzania na fursa zilizopo ndani ya Afrika.