NBC NA VETA WAZINDUA ‘NBC WAJIBIKA SCHOLARSHIP’ KUWAINUA VIJANA 588 KUPITIA MAFUNZO YA UFUNDI STADI

Mkurugenzi Mtendaji wa Benki ya NBC, Theobald Sabi (wa pili kulia) pamoja na Mkurugenzi Mkuu wa Mamlaka ya Elimu na Mafunzo ya Ufundi Stadi (VETA), Anthony Kasore (wa pili kushoto) wakionesha mfano wa hundi yenye thamani ya Tsh Milioni 150 ikiwa ni thamani ya ufadhili unaotelewa na benki hiyo katika kufadhili utekelezaji wa mpango wa ufadhili wa masomo ya ufundi kwa vijana nchini unaofahamika kama “NBC Wajibika Scholarship”. Hafla ya uzinduzi wa utekelezaji wa mpango huo ilifanyika jijini Dar es Salaam ikihusisha maofisa kutoka pande zote mbili. Kushoto ni Mkuu wa Idara ya Sekta ya Umma wa NBC, Joyce Maruba na Meneja wa Mafunzo ya Ufundi Stadi VETA, Anna Nyoni (kulia).

Dar es Salaam, Aprili 21, 2026 — Katika hatua muhimu ya kuendeleza ajira na kujenga nguvu kazi yenye ujuzi nchini, Benki ya Taifa ya Biashara (NBC) kwa kushirikiana na Mamlaka ya Elimu na Mafunzo ya Ufundi Stadi (VETA) wamezindua rasmi mpango wa ufadhili wa masomo ya ufundi unaojulikana kama “NBC Wajibika Scholarship.”

Mpango huu unalenga kuwainua vijana 588 kupitia mafunzo ya muda mfupi ya ufundi stadi, ikiwa ni sehemu ya mchango wa taasisi hizo katika kuunga mkono jitihada za serikali za kupunguza ukosefu wa ajira na kukuza uchumi wa taifa.

Uzinduzi huo ulifanyika katika makao makuu ya NBC jijini Dar es Salaam, ukihudhuriwa na viongozi waandamizi kutoka pande zote mbili, akiwemo Mkurugenzi Mtendaji wa NBC, Theobald Sabi, pamoja na Mkurugenzi Mkuu wa VETA, Anthony Kasore.

Akizungumza katika hafla hiyo, Bw. Sabi alibainisha kuwa NBC imetenga jumla ya shilingi milioni 150 kufadhili programu hiyo katika awamu ya kwanza. Alieleza kuwa vijana watakaonufaika watapata mafunzo katika fani zenye uhitaji mkubwa sokoni, zikiwemo umeme, uhandisi mitambo, ujenzi, pamoja na huduma za hoteli na utalii.

“Mafunzo haya si tu yatatoa vyeti, bali yatatoa ujuzi wa vitendo unaohitajika katika kujiajiri au kuajiriwa. Tunataka vijana hawa wawe sehemu ya suluhisho la kiuchumi nchini,” alisema Bw. Sabi.

Mafunzo hayo yatadumu kati ya miezi mitatu hadi sita na yatatolewa katika vyuo vya VETA vilivyopo Morogoro (Kihonda) na Mwanza. Ili kuimarisha ujumuishaji wa kifedha, kila mnufaika atafunguliwa akaunti ya NBC Kua Nasi, pamoja na kuunganishwa na fursa za kibiashara kupitia majukwaa ya NBC Business Club.

Kwa upande wake, Bw. Kasore aliipongeza NBC kwa hatua hiyo, akieleza kuwa mchango huo unakuja wakati muafaka ambapo VETA inalenga kufikia wanafunzi 120,000 kila mwaka. Hadi sasa, taasisi hiyo tayari imesajili zaidi ya wanafunzi 101,000.

“Huu ni uwekezaji wa moja kwa moja kwa maendeleo ya taifa. Tunahitaji wadau wengi zaidi kuunga mkono juhudi hizi ili kuhakikisha vijana wanapata ujuzi unaohitajika katika soko la ajira,” alisisitiza Bw. Kasore.

Aidha, alieleza kuwa uteuzi wa Morogoro na Mwanza umezingatia mahitaji ya soko katika maeneo hayo, huku akidokeza uwezekano wa kupanua mpango huo katika mikoa mingine nchini kadri utekelezaji utakavyoendelea.

Hatua Muhimu kwa Ajira na Uchumi

Uzinduzi wa NBC Wajibika Scholarship unaakisi namna ushirikiano kati ya sekta binafsi na taasisi za umma unavyoweza kuleta mabadiliko chanya katika jamii. Kwa kuwekeza katika elimu ya ufundi stadi, NBC na VETA wanachangia moja kwa moja katika kujenga kizazi cha vijana wenye uwezo wa kujiajiri, kuongeza uzalishaji, na kuchochea ukuaji jumuishi wa uchumi wa Tanzania.

Kadri changamoto ya ajira kwa vijana inavyoendelea kuwa ajenda muhimu kitaifa, mipango kama hii inabeba matumaini mapya kwa maelfu ya vijana wanaotafuta fursa za kujikwamua kiuchumi kupitia ujuzi na ubunifu.