BENKI YA NMB YATUZWA NA WCF KWA UONGOZI BORA KATIKA MASUALA YA RASILIMALI WATU

Dar es Salaam

Benki ya NMB imeendelea kuthibitisha uongozi wake katika usimamizi bora wa rasilimali watu baada ya kutunukiwa tuzo maalum na Mfuko wa Fidia kwa Wafanyakazi (WCF) kwa kuzingatia kikamilifu kanuni pamoja na uwasilishaji wa michango kwa wakati.

Tuzo hiyo ilitolewa wakati wa maadhimisho ya miaka 10 ya WCF, yaliyofanyika katika Kituo cha Mikutano cha Kimataifa cha Julius Nyerere (JNICC) jijini Dar es Salaam. Hafla hiyo ilihudhuriwa na viongozi wa serikali, waajiri, wadau wa ajira na mifuko ya hifadhi ya jamii kutoka sekta mbalimbali nchini.

Kwa niaba ya Benki ya NMB, Mkuu wa Idara ya Rasilimali Watu, Onesmo Kabeho, alipokea tuzo hiyo.

Waziri Mkuu Majaliwa Apongeza Mafanikio ya WCF

Akizungumza wakati wa hafla hiyo, Waziri Mkuu wa Jamhuri ya Muungano wa Tanzania, Mhe. Kassim Majaliwa Majaliwa (Mb), aliipongeza menejimenti ya WCF kwa kutekeleza majukumu yake kwa ufanisi katika kipindi cha miaka 10. Vilevile, alimpongeza Mkurugenzi Mkuu wa WCF, Dkt. John Mduma, kwa uongozi wake mahiri tangu kuanzishwa kwa taasisi hiyo.

Mhe. Majaliwa alisisitiza kuwa huduma za fidia kwa wafanyakazi si hiari bali ni haki ya msingi ambayo inapaswa kulindwa na kusimamiwa kwa uwajibikaji wa hali ya juu. Aliongeza kuwa Serikali ya Awamu ya Sita inayoongozwa na Rais Dkt. Samia Suluhu Hassan itaendelea kufanya maboresho ya maslahi ya wafanyakazi ili kuhakikisha haki na usawa katika maeneo ya kazi vinaimarishwa.

Kaulimbiu: “Miaka 10 ya WCF – Kazi Iendelee”

Kaulimbiu ya mwaka huu, “Miaka 10 ya Mfuko wa Fidia kwa Wafanyakazi: Kazi Iendelee,” iliangaziwa na Waziri Mkuu kama ishara ya mafanikio makubwa yaliyopatikana katika kipindi cha muongo mmoja.

Kupitia tuzo hii, NMB imeonesha dhamira yake ya dhati ya kuwa mwajiri bora anayejali ustawi, haki na usalama wa wafanyakazi wake, sambamba na kuchangia maendeleo endelevu ya taifa.

---

📢 Endelea kutembelea Blogu yetu kwa taarifa nyingine nyingi kuhusu mafanikio ya kampuni, uongozi wa mfano, na maendeleo muhimu katika sekta ya fedha na biashara nchini Tanzania!