KCB BANK NA ZHSF ZASAINI MAKUBALIANO YA USHIRIKIANO KUBORESHA UPATIKANAJI WA HUDUMA ZA AFYA ZANZIBAR

Mkurugenzi Mtendaji wa KCB Bank Tanzania, Bw. Cosmas Kimario (kushoto), akipeana mkono na Mkurugenzi Mkuu wa Zanzibar Health Service Fund (ZHSF), Dkt. Heri Marwa, baada ya kusaini Hati ya Makubaliano ya Ushirikiano wa Kimkakati (MoU) yenye lengo la kuimarisha utoaji wa huduma za afya Zanzibar kupitia suluhisho bunifu za kifedha na kiteknolojia, jijini Dar es Salaam.

Dar es Salaam; Oktoba 5, 2026 - KCB Bank Tanzania na Zanzibar Health Service Fund (ZHSF) zimesaini Hati ya Makubaliano ya Ushirikiano wa Kimkakati (MoU) yenye lengo la kuimarisha utoaji wa huduma za afya Zanzibar kupitia suluhisho bunifu za kifedha na kiteknolojia.

Ushirikiano huo unaweka msingi wa pande hizo kufanya kazi kwa pamoja katika maeneo muhimu, ikiwemo usajili na uandikishaji wa wanachama, ukusanyaji wa malipo, huduma za kibenki na ulipaji, usuluhishi wa miamala, ujumuishaji wa teknolojia pamoja na uundaji wa suluhisho za kifedha zinazolenga mahitaji ya ZHSF.

Hatua hiyo inalenga kuunga mkono ZHSF katika kutekeleza jukumu lake la kuimarisha ufadhili wa huduma za afya na kupanua upatikanaji wa huduma bora za afya kwa wananchi wa Zanzibar.

Akizungumza wakati wa hafla ya kusaini makubaliano hayo iliyofanyika katika Makao Makuu ya KCB Bank Tanzania, Mkurugenzi Mtendaji wa KCB Bank Tanzania, Bw. Cosmas Kimario, alisema ushirikiano huo unaonesha dhamira ya Benki hiyo ya kufanya kazi na taasisi zinazolenga kutatua changamoto halisi na kuboresha maisha ya jamii kupitia ubunifu.

“Kauli mbiu ya KCB Bank ni kwa ajili ya watu na maisha bora. Hii ina maana ya kutumia uwezo wetu, ushirikiano na ubunifu kuunda suluhisho zinazofanya tofauti ya kweli katika maisha ya kila siku ya watu.

“Huduma za afya ni msingi muhimu wa ustawi na maendeleo ya jamii, na tunajivunia kushirikiana na ZHSF kufanya upatikanaji wa huduma za afya kuwa rahisi zaidi, wenye ufanisi na jumuishi kwa wananchi wa Zanzibar,” alisema Bw. Kimario.

Aliongeza kuwa KCB Bank itatumia uwezo wake katika teknolojia za kidijitali, miundombinu ya malipo na utaalamu wa huduma za kifedha kuunga mkono ZHSF katika kuimarisha utoaji wa huduma, huku ikiboresha uzoefu wa wanachama kwa ujumla.

Kwa upande wake, Mkurugenzi Mkuu wa Zanzibar Health Service Fund (ZHSF), Bw. Heri Marwa, alisema ushirikiano huo ni hatua muhimu katika juhudi za Mfuko kuboresha mifumo ya utoaji wa huduma na uzoefu wa wanachama wake.

“Tunakaribisha ushirikiano huu na KCB Bank Tanzania kama fursa muhimu ya kuimarisha namna tunavyowahudumia wanachama wetu. Kwa kutumia teknolojia, mifumo bora ya malipo na suluhisho bunifu za kifedha, tunaweza kurahisisha upatikanaji wa huduma zetu, kuongeza ufanisi wa kiutendaji na kutekeleza kwa ufanisi zaidi jukumu letu la kuhakikisha wananchi wa Zanzibar wanapata huduma bora na nafuu za afya,” alisema Bw. Marwa.

Ushirikiano huo unatarajiwa kuongeza urahisi kwa wanachama wa ZHSF kupitia kuboreshwa kwa taratibu za usajili na malipo, kuimarishwa kwa mifumo ya usuluhishi wa miamala pamoja na matumizi mapana zaidi ya teknolojia katika mifumo ya ufadhili wa huduma za afya.

Aidha, ushirikiano huo unaakisi dhamira ya pamoja ya KCB Bank Tanzania na ZHSF ya kutumia ubunifu na ushirikiano wa kimkakati kutatua mahitaji halisi ya jamii na kuchangia maendeleo ya kijamii na kiuchumi ya Zanzibar.

Kwa KCB Bank Tanzania, ushirikiano huo unaimarisha dhamira ya Benki ya kufanya kazi na washirika katika sekta ya umma na binafsi kuendeleza suluhisho zinazoboresha maisha ya watu, kuimarisha jamii na kuchangia ukuaji endelevu wa uchumi.

KCB Bank Tanzania inaendelea kujitolea kuunga mkono ajenda ya maendeleo ya Zanzibar kupitia ushirikiano, ujumuishi wa kifedha na suluhisho bunifu zinazofanya huduma za kifedha na huduma nyingine muhimu kupatikana kwa urahisi zaidi, kuwa na ufanisi na kuendana na mahitaji ya jamii inayoihudumia.

---

Fuata Kitomari Banking & Finance Blog kwa habari za biashara, benki, fedha na maendeleo ya sekta mbalimbali Tanzania na Afrika Mashariki.