VODACOM YAANGAZIA JINSI MTANDAO UNAVYOCHOCHEA USHIRIKI WA KIDIJITALI KUELEKEA DIRA YA MAENDELEO 2050

Mkuu wa Idara ya Chapa na Mawasiliano wa Vodacom Tanzania, Yvonne Maruma, akizungumza katika Wiki ya Ubunifu Tanzania (IWTz) 2026, ambapo alielezea namna Vodacom inavyowaunganisha Watanzania na kuongeza tija kupitia huduma zake za “Zaidi ya Mtandao”, hususan kwa kuwawezesha watengeneza maudhui na watumiaji wa majukwaa ya mtandaoni kupata mtandao bora pamoja na simu janja zinazounga mkono ubunifu wao.

Mkuu wa Idara ya Chapa na Mawasiliano wa Vodacom Tanzania, Yvonne Maruma (kulia), akisalimiana na Naibu Katibu Mkuu wa Tume ya Taifa ya Mipango, Dkt. Blandina Kilama, baada ya kumaliza majadiliano kuhusu namna ya kuunganisha sauti za Watanzania, hususan watengeneza maudhui na watumiaji wa majukwaa ya mtandaoni.

Mkuu wa Idara ya Chapa na Mawasiliano wa Vodacom Tanzania, Yvonne Maruma (kulia), Mkurugenzi Mtendaji wa Mwananchi Communications Limited, Rosalynn Mndolwa-Mworia (wa pili kushoto), Meneja wa Uchunguzi wa Vodacom Tanzania, Joseph Mnyune (kushoto), na Meneja Biashara, Ofisi ya Mkurugenzi Mtendaji wa Mwananchi Communications Limited, Tess Aloyce (wa pili kulia), wakizungumza wakati wa Wiki ya Ubunifu Tanzania (IWTz) 2026.

Ni katika Wiki ya Ubunifu Tanzania (IWTz) 2026

DAR ES SALAAM - September 2, 2026: Vodacom Tanzania imeangazia mchango wa mtandao, ubunifu na ujasiriamali katika kuchochea ushiriki wa kidijitali na kufanikisha malengo ya Dira ya Maendeleo Tanzania 2050.

Hayo yameelezwa wakati wa Wiki ya Ubunifu Tanzania (IWTz) 2026, tukio linalowakutanisha wabunifu, wajasiriamali, watunga sera, wawekezaji, vijana na wadau mbalimbali kwa lengo la kujadili na kuibua fursa za kukuza uchumi wa kidijitali nchini.

IWTz 2026 imefanyika chini ya kauli mbiu “Kutoka Matarajio hadi Mageuzi: Kuibua Njia ya Tanzania Kuelekea Ustawi Jumuishi.”

VODACOM YASHIRIKI MJADALA WA UCHUMI WA KIDIJITALI

Katika wiki hiyo ya ubunifu, Vodacom Tanzania imeshiriki katika mijadala kuhusu uchumi wa watengeneza maudhui na majukwaa ya mtandaoni, maonesho, mikutano na wadau, pamoja na shughuli za kuelimisha jamii kuhusu usalama wa mtandao.

Ushiriki huo unaonesha nafasi ya sekta ya mawasiliano katika kuwezesha Watanzania kutumia teknolojia na huduma za kidijitali kama nyenzo za kujifunza, kufanya biashara, kubuni na kujenga fursa za kiuchumi.

Akizungumza katika mjadala kuhusu watengeneza maudhui na majukwaa ya mtandaoni, Mkuu wa Idara ya Chapa na Mawasiliano wa Vodacom Tanzania, Yvonne Maruma, alisema thamani ya mtandao inaonekana zaidi kupitia fursa ambazo unawawezesha Watanzania kuzipata katika maeneo mbalimbali, ikiwemo elimu, biashara na ubunifu.

VODACOM YAWAWEZESHA WATENGENEZA MAUDHUI

Kupitia Vodacom Youth Base (VYB), Vodacom Tanzania inaendelea kuwawezesha vijana na watengeneza maudhui kutumia fursa zinazopatikana kupitia teknolojia na majukwaa ya kidijitali.

Mpango huo unalenga kuwawezesha watengeneza maudhui kuendelea kuwa na uwepo mtandaoni, kukuza shughuli zao za kidijitali na kutumia fursa zinazotokana na uchumi wa kidijitali.

Kwa kuendelea kuwezesha matumizi jumuishi ya teknolojia, Vodacom inaamini kuwa mtandao unaweza kuwa kichocheo muhimu cha ubunifu, ujasiriamali na ushiriki wa Watanzania katika uchumi wa kidijitali.

KUUNGA MKONO DIRA YA MAENDELEO 2050

Ushiriki wa Vodacom Tanzania katika Wiki ya Ubunifu Tanzania 2026 unaendana na juhudi za kukuza mageuzi ya kidijitali, uvumbuzi na ukuaji wa uchumi jumuishi, maeneo ambayo ni muhimu katika safari ya Tanzania kuelekea kutimiza malengo ya Dira ya Maendeleo 2050.

Kwa kuunganisha teknolojia, ubunifu na fursa za kiuchumi, wadau wanaendelea kutafuta namna ya kuhakikisha kuwa maendeleo ya kidijitali yanawafikia Watanzania wengi zaidi na kuwa sehemu ya msingi ya ustawi wa kiuchumi na kijamii.

Kitomari Banking & Finance Blog inaendelea kuwaletea wasomaji habari na taarifa muhimu kuhusu maendeleo katika sekta ya teknolojia, mawasiliano, biashara, benki na fedha nchini Tanzania.

Endelea kufuatilia Kitomari Banking & Finance Blog kwa habari na uchambuzi wa kina kuhusu biashara, benki na fedha.