BENKI YA NMB YAIMARISHA UBIA NA SMZ KUSUKUMA UKUAJI ENDELEVU ZANZIBAR

Rais wa Zanzibar na Mwenyekiti wa Baraza la Mapinduzi, Mhe. Dkt. Hussein Ali Mwinyi, akipokea zawadi maalum kutoka kwa Meneja wa Biashara Zanzibar wa Benki ya NMB, Bi. Naima Said Shaame, wakati wa Mkutano wa Watendaji Wakuu na Wenyeviti wa Bodi wa Taasisi za Kizanzibari uliofanyika Golden Tulip Airport Hotel, Zanzibar. Kushoto ni Mkuu wa Idara ya Biashara za Serikali wa NMB, Bi. Vicky Bishubo. Zawadi hiyo ilitolewa kama ishara ya kuthamini uongozi wa Rais Dkt. Mwinyi katika kukuza uchumi wa Zanzibar na kuimarisha mazingira wezeshi kwa biashara na uwekezaji.

Zanzibar, 24 Mei 2026 – Benki ya NMB Bank Plc imesema itaendelea kuimarisha ushirikiano wake na Serikali ya Mapinduzi Zanzibar (SMZ) pamoja na taasisi zake katika kuboresha mifumo ya malipo, huduma za kidijitali, makusanyo ya mapato na suluhisho za kifedha zinazolenga kuongeza ufanisi wa huduma kwa wananchi na wawekezaji.

Kauli hiyo imetolewa wakati wa Mkutano wa Watendaji Wakuu na Wenyeviti wa Bodi wa Taasisi za Kizanzibari uliofanyika katika Golden Tulip Zanzibar Airport kuanzia Mei 23 hadi 25, 2026.

Rais Mwinyi Ataka Mageuzi ya Kiutendaji

Akifungua mkutano huo, Rais wa Zanzibar na Mwenyekiti wa Baraza la Mapinduzi, Hussein Ali Mwinyi, aliwataka viongozi wa taasisi za umma kuharakisha mageuzi ya kiutendaji yatakayosaidia kuongeza tija, kupunguza utegemezi kwa Serikali Kuu na kuwezesha taasisi hizo kutoa gawio kwa Serikali.

Dkt. Mwinyi alisema maendeleo ya kiuchumi yanaweza kuongezeka kwa kasi zaidi kupitia ushirikiano madhubuti kati ya sekta ya umma na sekta binafsi, huku akitolea mfano mafanikio yanayoendelea kuonekana katika sekta ya benki nchini.

“Taasisi zetu zinapaswa kujifunza kutoka kwenye mifano mizuri ya sekta binafsi, hasa mabenki binafsi yanayoonyesha ufanisi, faida na mchango mkubwa wa gawio kwa Serikali,” alisema Dkt. Mwinyi.

NMB Yaona Zanzibar Kama Mshirika wa Kimkakati

Kwa upande wake, Mkuu wa Idara ya Biashara za Serikali wa NMB Bank Plc, Bi. Vicky Bishubo, alisema benki hiyo inaiona Zanzibar kama mshirika muhimu katika ajenda ya maendeleo endelevu kupitia sekta mbalimbali ikiwemo uwekezaji, uchumi wa buluu, utalii, biashara, teknolojia na huduma za kifedha.

Alisema NMB tayari inaendelea kushirikiana na taasisi mbalimbali za Zanzibar zikiwemo EGAZ na ZIPA katika kuboresha huduma za kidijitali, mazingira ya uwekezaji pamoja na uhifadhi wa maeneo ya kimkakati.

Mafunzo kwa Wajasiriamali Zanzibar

Bi. Bishubo alibainisha kuwa benki hiyo pia imeendelea kutoa mafunzo ya ujasiriamali na elimu ya kifedha kwa zaidi ya wajasiriamali 10,000 wa Zanzibar wanaojihusisha na shughuli za uchumi wa buluu ikiwemo kilimo cha mwani, uzalishaji wa chumvi na uvuvi.

Hatua hiyo, alisema, inalenga kuongeza uwezo wa kifedha kwa wananchi, kukuza biashara ndogo na za kati pamoja na kuimarisha mchango wa sekta hizo katika uchumi wa Zanzibar.

Ushirikiano wa Sekta ya Fedha na Serikali

Ushirikiano kati ya taasisi za fedha na Serikali umeendelea kuwa kichocheo muhimu katika kuharakisha maendeleo ya kiuchumi Zanzibar, hasa katika kipindi ambacho Serikali inaendelea kusisitiza matumizi ya teknolojia, uwekezaji na uwajibikaji wa taasisi za umma ili kuongeza mapato na ufanisi wa utoaji huduma.