Zanzibar — Katika jitihada za kuendelea kuimarisha sekta ya ujenzi visiwani Zanzibar, Benki ya NMB Plc imezindua maboresho makubwa ya masuluhisho ya kifedha yaliyobuniwa mahsusi kwa ajili ya makandarasi. Hatua hii inalenga kuyawezesha makampuni ya ndani kushiriki na kutekeleza miradi mikubwa zaidi, sambamba na kuchochea ukuaji wa uchumi wa Zanzibar.
Uzinduzi wa maboresho hayo ulifanyika katika Hoteli ya Verde, Zanzibar, na kuhudhuriwa na viongozi wakuu wa serikali, wadau wa sekta ya ujenzi, pamoja na makandarasi kutoka Unguja na Pemba. Mgeni Rasmi katika hafla hiyo alikuwa Waziri wa Ujenzi na Uchukuzi, Mheshimiwa Dkt. Khalid Salum Mohamed, huku ujumbe wa Benki ya NMB ukiongozwa na Afisa Mkuu wa Wateja Binafsi na Biashara, Bw. Filbert Mponzi.
Serikali Yapongeza Hatua ya NMB
Akizungumza katika hafla hiyo, Waziri wa Ujenzi na Uchukuzi, Mheshimiwa Dkt. Khalid Salum Mohamed, aliipongeza Benki ya NMB kwa kuja na mpango alioueleza kuwa wa wakati muafaka na wenye mchango mkubwa katika maendeleo ya Zanzibar.
“Hii siyo tu ishara ya nia njema, bali ni uwekezaji wa kimkakati katika msingi wa maendeleo yetu ya kitaifa. Serikali ina kila sababu ya kuipongeza Benki ya NMB kwa maboresho haya,” alisema Dkt. Khalid.
Waziri huyo alitumia fursa hiyo kuwasihi makandarasi wa ndani kutumia kikamilifu huduma hizo mpya ili kuongeza ushindani wao na kupata zabuni kubwa ambazo kwa muda mrefu zimekuwa zikienda kwa makandarasi wa kigeni kutokana na uwezo mkubwa wa kifedha walionao.
Aidha, alisisitiza kuwa mpango huo unaendana na maono ya Rais wa Zanzibar na Mwenyekiti wa Baraza la Mapinduzi, Mheshimiwa Dkt. Hussein Ali Mwinyi, ya kuwawezesha makandarasi wazawa kushiriki kikamilifu katika utekelezaji wa miradi mikubwa ya kimkakati visiwani humo.
“Nawasihi ndugu zangu makandarasi kufika katika matawi ya NMB Unguja na Pemba, mkumbatie fursa hizi na kuzitumia kukuza biashara zenu. Dhamana hizi zitawawezesha kushindana kwenye zabuni kubwa zaidi,”aliongeza Waziri huyo.
NMB Yaeleza Dhamira ya Kuwawezesha Makandarasi Wazawa
Kwa upande wake, Afisa Mkuu wa Wateja Binafsi na Biashara wa Benki ya NMB, Bw. Filbert Mponzi, alieleza kuwa maboresho hayo yametokana na utafiti wa kina kuhusu changamoto zinazowakabili makandarasi wa ndani, hususan katika kupata dhamana na mitaji ya kushiriki zabuni kubwa.
“Tulibaini kuwa changamoto kubwa kwa makandarasi wengi ni uwezo wa kifedha na dhamana. Maboresho haya yanalenga kuvunja kikwazo hicho na kuwawezesha wazawa kushindana na kushinda miradi mikubwa,”alisema Bw. Mponzi.
Ongezeko Kubwa la Dhamana za Kifedha
Miongoni mwa maboresho makubwa yaliyotangazwa ni ongezeko la kiwango cha juu cha Bid Bond Guarantee, ambacho kimepanda kutoka Shilingi Bilioni 2.5 hadi Shilingi Bilioni 25. Cha kuvutia zaidi ni kwamba kiasi hiki kinapatikana bila hitaji la dhamana, hatua inayotarajiwa kufungua fursa kwa makandarasi wengi zaidi kushiriki zabuni za umma na binafsi.
Vilevile, NMB imeongeza viwango vya Dhamana za Utendaji (Performance Guarantees) na Dhamana za Malipo ya Awali (Advance Payment Guarantees) hadi kufikia Shilingi Bilioni 3 kwa kila mradi bila dhamana, hususan kwa taasisi za Serikali ya Mapinduzi ya Zanzibar ikiwemo ZIPA, ZSSF, ZHC, ZPC, ZAA pamoja na wizara mbalimbali. Hii ni ongezeko kutoka kikomo cha awali cha Shilingi Bilioni 1.5.
Kwa miradi mikubwa ya kimkakati, hususan ya miundombinu kama barabara na majengo, Benki ya NMB imeeleza kuwa iko tayari kutoa dhamana zinazozidi Shilingi Bilioni 3 bila dhamana, kulingana na tathmini ya mradi husika.
Ugatuzi wa Mchakato wa Idhini Waharakisha Huduma
Katika kuboresha zaidi utoaji wa huduma, NMB imetekeleza ugatuzi wa mchakato wa idhini ambapo Mameneja wa Matawi sasa wamewezeshwa kuidhinisha Bid Bond, Performance na Advance Payment Guarantees hadi Shilingi Milioni 500 bila dhamana. Hatua hii itapunguza muda wa kushughulikia maombi hadi masaa 24–36 endapo nyaraka zote zitakuwa zimekamilika. Kwa maombi yanayozidi kiwango hicho, maamuzi yatatolewa na makao makuu ya benki ndani ya siku 10 za kazi.
Wadau Wapongeza Mpango
Akitoa maoni yake, Mjumbe wa Bodi ya Usajili wa Makandarasi Zanzibar (ZCRB), Mhandisi Kassim Ali Omary, aliipongeza NMB kwa mchango wake katika uwezeshaji wa uchumi wa ndani.
“Huu ni uthibitisho wa dhamira ya NMB katika kuwawezesha makandarasi wazawa ambao ni nguzo muhimu ya uchumi wetu. Faida zake zitaonekana moja kwa moja katika jamii,” alisema.
Mustakabali Mpya kwa Sekta ya Ujenzi Zanzibar
Kwa ujumla, maboresho ya huduma za Benki ya NMB yanatarajiwa kuleta mageuzi makubwa katika sekta ya ujenzi Zanzibar, yakiongeza uwezo wa makandarasi wa ndani, kuimarisha ushindani, na kuchangia kwa kiasi kikubwa katika ukuaji endelevu wa uchumi wa visiwa hivyo.
No comments:
Post a Comment