Kitomari Banking & Finance Blog: VODACOM NA STANBIC WAGUSWA NA JAMII: WATOA MSAADA KWA WALEMAVU, SHULE YA MSINGI SIMIYU

Sunday, 13 July 2025

VODACOM NA STANBIC WAGUSWA NA JAMII: WATOA MSAADA KWA WALEMAVU, SHULE YA MSINGI SIMIYU

Meneja Mauzo Mwandamizi wa Vodacom Tanzania Plc Kanda ya Ziwa, Straton Mchau (wa pili kushoto), pamoja na Meneja wa Benki ya Stanbic Tanzania Tawi la Mwanza, Geoffrey Makondo, wakikabidhi moja ya viti mwendo kwa Afisa Elimu Maalum wa Halmashauri ya Mji wa Bariadi, Rutherford Magayane (kulia), na Mkuu wa Shule ya Msingi Sima A, Mwl. Adalbert Chambia (wa pili kulia), katika Shule ya Msingi Sima A, wilayani Bariadi, mkoani Simiyu.

Bariadi, Simiyu – Julai 12, 2025

Katika kuendeleza dhamira yao ya uwajibikaji kwa jamii, Vodacom Tanzania Plc kwa kushirikiana na Benki ya Stanbic Tanzania wamekabidhi msaada muhimu kwa Shule ya Msingi Sima A, iliyoko Wilaya ya Bariadi, mkoani Simiyu.

Hafla hiyo ilihusisha viongozi waandamizi kutoka taasisi hizo mbili, wakiongozwa na Meneja Mauzo Mwandamizi wa Vodacom Kanda ya Ziwa, Bw. Straton Mchau, na Meneja wa Stanbic Bank Tanzania Tawi la Mwanza, Bw. Geoffrey Makondo.

Msaada kwa Wanafunzi Wenye Mahitaji Maalum

Katika hafla hiyo, viongozi hao walimkabidhi Afisa Elimu Maalum wa Halmashauri ya Mji wa Bariadi, Bw. Rutherford Magayane, na Mkuu wa Shule ya Msingi Sima A, Mwl. Adalbert Chambia, msaada wa vifaa mbalimbali vya kusaidia wanafunzi wenye ulemavu pamoja na vifaa vya kuimarisha mazingira ya shule.

Vifaa vilivyokabidhiwa ni pamoja na:

Viti mwendo (wheelchairs) 4
Magongo ya kutembelea (walking sticks) 5
Magongo ya mabega (crutches) 5
Magongo ya kiwiko (elbow crutches) 5

Kuboresha Miundombinu na Mazingira ya Kujifunzia

Zaidi ya msaada kwa wanafunzi wenye mahitaji maalum, Vodacom na Stanbic pia walikabidhi:

Miche 100 ya miti kwa ajili ya upandaji wa mazingira ya shule
Matundu 10 ya vyoo
Magodoro 40 na vitanda 20 kwa matumizi ya wanafunzi

Hatua hii inalenga kuboresha mazingira ya ujifunzaji, afya na ustawi wa wanafunzi, na kuongeza motisha kwa walimu na jamii inayozunguka shule hiyo.

Safari ya Kijamii Itakayohitimishwa Butiama

Msaada huu umetolewa kama sehemu ya msafara maalum wa kijamii unaodhaminiwa na Vodacom Tanzania kwa kushirikiana na Benki ya Stanbic Tanzania.

Msafara huo unatarajiwa kuhitimishwa tarehe 13 Julai 2025 katika Mkoa wa Mara, wilayani Butiama — nyumbani kwa Hayati Baba wa Taifa, Mwl. Julius Kambarage Nyerere.

Lengo kuu la msafara huu ni kugusa maisha ya Watanzania wanaoishi katika mazingira magumu kwa kutoa msaada wa vifaa vinavyohitajika zaidi, huku wakihamasisha taasisi nyingine kujiunga katika kutatua changamoto za kijamii kwa vitendo.