TMRC YAWEZESHA UPASUAJI WA MOYO KWA WATOTO WANNE

Mkurugenzi wa Taasisi inayotoa mikopo kwa mabenki na Taasisi nyingine za kifedha kwaajili ya ujenzi na ununuzi wa nyumba (TMRC), Oscar Mgaya (mwenye koti jeusi) akikabidhi mfano wa hundi yenye thamani ya shilingi milioni nane kwa Mkurugenzi Mtendaji wa Taasisi ya Moyo ya Jakaya Kikwete (JKCI), Profesa Mohamed Janabi, kwaajili ya matibabu ya moyo kwa watoto wane (4) ambao wamekosa pesa kwaajili ya matibabu halo. Wengine ni maofisa wa Taasisi hiyo. Makabidhiano hayo yalifanyika hivi karibuni jijini Dar es Salaam. 

Mkurugenzi wa Taasisi inayotoa Mikopo kwa Mabenki na Taasisi nyingine za kifedha kwaajili ya ujenzi na ununuzi wa nyumba (TMRC), Oscar Mgaya wapili (kushoto) akifafanua jambo wakati wa hafla ya kukabidhi msaada wa shilingi milioni nane kwaajili ya matibabu ya moyo kwa watoto wane (4) ambao hawana uwezo wakupata pesa kwaajili ya matibabu hayo. Kushoto ni Mkurugenza wa Fedha wa TMRC, Oswald Urassa na wa pili kulia ni Mkurugenzi Mtendaji wa Taasisi ya Moyo ya Jakaya Kikwete (JKCI), Profesa Mohamed Janabi.

14, DESEMBA 2017 - (DAR ES SALAAM), Kampuni ya Tanzania Mortgage Refinance Limited (TMRC), imetoa msaada wa kiasi cha Shilingi milioni Nane (Shilingi 8,000,000) kwa ajili ya upasuaji wa moyo kwa watoto wanne jijini Dar es Salaam.

Akikabidhi mfano wa hundi hiyo ya Shilingi milioni Nane kwa Mkurugenzi Mtendaji wa Taasisi ya Moyo ya Jakaya Kikwete (JKCI), Profesa Mohamed Janabi, Afisa Mtendaji Mkuu (CEO) wa TMRC, Oscar Mgaya, alisema kuwa wameamua Kuitikia wito huu wa kuwasaidia watoto hao ambao hawana uwezo na bila msaada huo pengine wasingeweza kupata huduma hiyo na maisha yao yangekua hatarini.

"Tumeamua kusaidia tiba kwa hawa watoto baada ya kuona tangazo kwenye kituo cha televisheni cha Clouds. Hivyo basi, tukaona umuhimu wa kufanikisha malipo kwa ajili ya upasuaji wa watoto hawa wanne," Bw. Mgaya alisema.

Aidha, Mtendaji Mkuu huyo, alisema taasisi yake hiyo ambayo inatoa mikopo ya ujenzi au ununuzi wa nyumba kupitia mabenki na taasisi nyingine za fedha kuwa, waliamua kutoa kiasi cha Shilingi milioni mbili (Shilingi 2,000,000) kwa upasuaji wa kila mtoto kwa kuwa ni taifa la kesho. Hii ni sehemu ya kutekeleza wajibu wetu katika jamii (corporate social responsibility).

"Tumeamua kutoa kiasi kidogo kwa watoto hawa wadogo ambao miongoni mwao wana ndoto za kuwa wataalamu wa benki, madaktari, marubani n.k. Hivyo, taasisi yetu imeona umuhimu wa kufanya ndoto za hawa watoto kutimia kwa kuwawezesha kupata tiba," alisema.

Bw. Mgaya ametoa rai kwa wadau wengine kujitokeza kusaidia wenye uhitaji wa tiba hii ya moyo hasa kwa wale wenye maisha duni ambapo uhitaji unaelezewa kuwa ni mkubwa.

Kwa upande wake, Mkurugenzi Mtendaji wa Taasisi ya Moyo ya Jakaya Kikwete (JKCI), Profesa Mohamed Janabi, alisema kwamba taasis yake imejipanga kuhakikisha kuwa inaendelea kupunguza idadi ya wagonjwa wanaoenda kutibiwa nje ya nchi, kutokana na magonjwa ya moyo na badala yake kutibiwa nchini kwa gharama nafuu.

"Licha ya kuwasaidia watanzania kupunguza gharama kwa matibabu ya moyo hapa nchini badala ya nje ya nchi, pia hii imepunguza sana gharama ambazo serikali imekuwa ikizitumia kila mwaka kutibu maradhi kama hayo nje ya nchi," Prof Janabi alisema.

Tangu taasisi yetu ianze kutoa tiba hii mwaka 2008, tumeweza kupunguza kwa kiwango kikubwa idadi ya watanzania wanaotibiwa nje ya nchi. Hata hivyo, ameishukuru TMRC, kwa msaada wa fedha kwa ajili ya tiba kwa watoto hao wanne na kuziomba taasisi nyingine kuiga mfano.

“Taasisi yetu inahamasisha watu kuchangia milioni 2 kwa ajili ya watoto walio katika hali ngumu na kiasi kingine kinachangiwa na serikali. Kwa wiki hii tumejipanga kufanya upasuaji kwa watoto 60 na hii ndiyo zawadi ya Sikukuu ya Krismas toka kwetu,” alisema Prof. Janabi.

Hadi sasa, Prof. Janabi alisema kuwa watoto 300 wameshafanyiwa upasuaji wa moyo toka Januari hadi sasa ingawa lengo ilikuwa ni kufikia watototo 400.

Akizungumzia kuhusu uhitaji wa huduma hii ya upasuaji wa moyo, Prof. Janabi alisema kuwa ni mkubwa sana ambapo kati ya watoto miloini 2 wanaozaliwa, asilimia 1 wanatatizo la moyo.

“Miongoni mwa mambo yanayosababisha tatizo la moyo kwa watoto linatokana na wazazi kutozingatia chanjo, lishe nakadhalika,” alisema.