GGML KUSHIRIKI KIKAMILIFU MAONESHO YA 8 YA TEKNOLOJIA YA MADINI MKOANI GEITA

Geita, 16 Septemba 2025 – Geita Gold Mining Limited (GGML), kampuni tanzu ya AngloGold Ashanti, imethibitisha kushiriki kikamilifu katika Maonesho ya 8 ya Teknolojia ya Madini yatakayofanyika katika viwanja vya Bombambili, mkoani Geita kuanzia Septemba 18 hadi 28, 2025. Mbali na ushiriki wake, GGML imetoa udhamini wa Shilingi milioni 200 za Kitanzania, ikiwa ni sehemu ya mchango wake katika mafanikio ya maonesho hayo muhimu.

Kampuni hiyo, ambayo mwaka huu inaadhimisha miaka 25 tangu kuanza shughuli zake nchini Tanzania, imeendelea kuwa mdau mkubwa wa maendeleo ya sekta ya madini na jamii kwa ujumla katika mkoa wa Geita – mkoa unaoongoza kwa shughuli za uchimbaji madini nchini.

Mkoa wa Geita umejipambanua kama kitovu cha uchimbaji madini nchini, huku shughuli hizi zikichangia ukuaji mkubwa wa uchumi wa ndani. Kupitia kampuni kama GGML, maendeleo ya elimu, ujenzi wa miundombinu, na fursa za ajira zimeongezeka, hivyo kuimarisha maisha ya wakazi wa Geita na maeneo jirani.

JUKWAA LA UBUNIFU NA USHIRIKIANO

Maonesho ya Teknolojia ya Madini yamekuwa jukwaa muhimu la kuwakutanisha wadau mbalimbali wa sekta – wakiwemo wachimbaji wakubwa na wadogo, taasisi za serikali, wataalamu wa teknolojia, watoa huduma na jamii – kwa lengo la kubadilishana maarifa, kuonesha ubunifu na kujadili mbinu bora za kuongeza tija.

GGML itatumia maonesho haya kuonesha teknolojia mpya, mbinu za kuongeza ufanisi, na vipaumbele vyake katika usalama, ushirikiano, na ubora wa kazi. Pia kampuni itaangazia mafanikio yake katika kipindi cha miaka 25 ya uwepo nchini, hususan katika kusaidia maendeleo endelevu ya jamii inayozunguka mgodi.

KAULI ZA WADAU

Akizungumza kuelekea maonesho hayo, Meneja Mwandamizi wa Uendelevu wa GGML, Gilbert Mworia, alisema:

“Kushiriki katika Maonesho ya Teknolojia ya Madini kwa mwaka huu ni fursa ya kutafakari miaka 25 ya ushirikiano wetu na mchango katika sekta ya madini. Watu na taasisi nyingi zinazoshiriki katika shughuli zetu pia zitakuwepo kwenye tukio hili. Ushiriki wetu unathibitisha umuhimu wa ushirikiano na ubunifu endelevu katika kuimarisha ukuaji wa sekta ya madini.”

Kwa upande wa wananchi, Bi. Zainabu John, mkazi wa Kata ya Kalangalala, alisema:

“Kila mwaka haya maonesho yanapofanyika hapa Geita, tunajifunza mambo mengi kuhusu teknolojia za kisasa kwenye uchimbaji na namna makampuni kama GGML yanavyosaidia jamii. Pia ni fursa ya sisi wafanyabiashara wadogo kupata wateja wengi na kipato kuongezeka.”

WASHIRIKI WENGI KUTOKA SEKTA YA MADINI

Maonesho haya yanatarajiwa kuvutia washiriki kutoka kila pembe ya mnyororo wa thamani wa madini – kuanzia wachimbaji, wasambazaji wa vifaa, wataalamu wa mazingira, watoa mafunzo, hadi watunga sera – kwa lengo la kushirikiana kuimarisha sekta ya madini nchini Tanzania kwa njia endelevu, salama na yenye tija.

---

👉 Soma zaidi kuhusu sekta ya madini na uwepo wa GGML nchini Tanzania kupitia Kitomari Banking & Finance Blog