EXIM BANK YAZINDUA MKOPO ‘KOPA KIBOSS’ – MAREJESHO MPAKA MIAKA 11 KWA WATUMISHI WA UMMA

Mkuu wa Mtandao wa Wateja wa Benki ya Exim Tanzania, Agnes Kaganda (katikati), akizungumza wakati wa uzinduzi wa kampeni ya ‘Kopa Kiboss na Wafanyakazi Loan’, ambapo Exim inakuwa benki ya kwanza nchini kumwezesha mtumishi wa umma kufanya marejesho kwa muda wa hadi miaka 11, na kuchukua mkopo kuanzia TSh 200,000 hadi TSh milioni 200. Kushoto ni Elihoria Matillya, Meneja Mkuu – Mauzo, na Mtenya Cheya, Mkuu wa Bidhaa na Uhakika wa Mapato, wakiwa katika tukio hilo lililofanyika tarehe 13 Agosti 2025 katika Makao Makuu ya Benki hiyo, Exim Tower, jijini Dar es Salaam.

Dar es Salaam, Agosti 13, 2025 – Katika hatua kubwa ya kuimarisha ustawi wa kifedha wa watumishi wa umma, Benki ya Exim Tanzania imefanya maboresho makubwa kwenye huduma yake ya Wafanyakazi Loan na kuzindua kampeni ya mikopo maarufu kama ‘Kopa Kiboss’. Hatua hii inaiweka Exim Tanzania kama benki ya kwanza nchini kuruhusu mtumishi wa umma kurejesha mkopo kwa kipindi cha hadi miaka 11, huku kiwango cha mkopo kikianzia TSh 200,000 hadi kufikia TSh milioni 200.

Huduma hii inalenga kuwafikia watumishi wa umma kote nchini kupitia suluhisho za kifedha zenye ubunifu na masharti nafuu. Zaidi ya muda mrefu wa marejesho, maboresho haya pia yanajumuisha huduma ya kuhamisha mikopo (loan takeover) kutoka taasisi nyingine – hatua ambayo Exim Tanzania imeiwezesha kwa mara ya kwanza nchini kupitia mfumo wa kisasa wa mtandaoni wa Employee Self Service (ESS), unaojulikana kama ‘Utumishi Portal’.

Agnes Kaganda, Mkuu wa Mtandao wa Wateja wa Exim Bank Tanzania, alisema:

“Lengo letu kuu ni kuhakikisha watumishi wa umma wananufaika na suluhisho za kifedha zinazoleta mabadiliko chanya na ya kweli katika maisha yao. Kwa kuhamisha mikopo yao iliyopo, tunalenga kuwapunguzia mzigo wa madeni na kuwapatia masharti bora ya ulipaji yaliyoboreshwa kulingana na mahitaji yao binafsi.”

Kwa mujibu wa benki, Wafanyakazi Loan inalenga kumsaidia mtumishi wa umma kutotegemea tu mshahara wake, bali kuweza kugharamia matumizi mbalimbali kama kulipia ada za shule, kuhudumia familia, kulipa madeni, au kuanzisha biashara kwa ajili ya kujiendeleza kiuchumi.

Mtenya Cheya, Mkuu wa Bidhaa na Uhakika wa Mapato wa benki hiyo, alieleza kuwa huduma hii imeundwa kwa kuzingatia urahisi, uharaka na unyumbufu:

“Wakopaji watakuwa na nafasi ya kuongeza mikopo yao kulingana na uhitaji, huku ulipaji ukipangwa kwa mafungu sawa kila mwezi (EMI) katika kipindi chote cha mkopo, jambo linalowapa uhakika na amani ya akili.”

Pia, mkopo huu unajumuisha bima ya maisha ya mkopo (credit life insurance), inayohakikisha salio lililosalia litalipwa iwapo mkopaji atafariki dunia au kupata ulemavu wa kudumu.

Elihoria Matillya, Meneja Mkuu wa Mauzo wa Exim Tanzania, alihitimisha:

“Tukiwa taasisi ya kwanza kutoa muda wa marejesho wa hadi miaka 11 kwa masharti nafuu, tunatoa wito kwa watumishi wote wa umma kote nchini kuchangamkia fursa hii ya kipekee kwa ajili ya maendeleo yao, familia zao, au biashara zao. Karibuni Exim Bank Tanzania.”

Watumishi wa umma wanaotaka kuomba mkopo huu wanaweza kutembelea tovuti ya ESS portal kupitia https://ess.utumishi.go.tz, kuchagua Benki ya Exim, na kufuata hatua rahisi kukamilisha maombi.

Kwa maboresho haya, Exim Bank Tanzania inaendeleza nafasi yake kama mshirika wa kifedha wa kuaminika kwa watumishi wa umma, ikiwapatia zana na fursa za kufikia malengo yao ya kifedha na kujenga maisha bora yenye tija.

---

Fuatilia Kitomari Banking & Finance Blog
Kwa habari za kina, takwimu, na uchambuzi wa sekta ya fedha, benki na uchumi, endelea kufuatilia Kitomari Banking & Finance Blog kupitia tovuti yetu na mitandao ya kijamii. Jiunge nasi ili usipitwe na taarifa muhimu kuhusu masoko, bidhaa za kifedha, na mwenendo wa uchumi nchini na kimataifa.