EQUITY BANK YAWEZESHA WAKANDARASI WANAWAKE KUPITIA UFADHILI WA MKUTANO WA TWCA

Equity Bank Tanzania imeendeleza dhamira yake ya kukuza huduma za kifedha kwa wafanyabiashara wadogo na wa kati (MSEs na SMEs) kwa kudhamini Mkutano Mkuu wa Chama cha Wakandarasi Wanawake Tanzania (TWCA). Hatua hii inalenga kuchangia moja kwa moja juhudi za kitaifa za kuwawezesha wanawake kiuchumi, hususan katika sekta ya ujenzi inayokua kwa kasi nchini.

Akizungumza katika tukio hilo, Mkuu wa Kitengo cha Fedha za Biashara na Mtaji wa Uendeshaji wa Equity Bank, Bw. Stephen Matinya, alisema benki imebuni suluhisho maalum za kifedha kwa wakandarasi wanawake, zikiwemo mikopo ya mtaji wa uendeshaji, ushauri wa kifedha na huduma za kidijitali zinazorahisisha miamala. Aliongeza kuwa mipango hii inaendana na mikakati ya maendeleo endelevu kwa kuhakikisha wanawake wanapata nafasi sawa na wanaume katika zabuni, ufadhili na fursa za biashara.

Kwa upande wake, Bi. Jacqueline Mollel, Meneja Mwandamizi wa Fedha za Biashara na Mtaji wa Uendeshaji kutoka Equity Bank, alibainisha kuwa uwezeshaji wa kifedha unapaswa kuambatana na elimu ya ujasiriamali na usimamizi wa miradi. Alisema benki imekuwa ikiendesha mafunzo ya mara kwa mara kwa wateja wake ili kuongeza uelewa kuhusu usimamizi wa fedha, uboreshaji wa rekodi za biashara, na matumizi ya teknolojia katika kusimamia miradi mikubwa.

Mkutano wa TWCA ulifanyika kwa kaulimbiu “Kuwawezesha Wakandarasi Wanawake: Sera hadi Matokeo”, na uliwakutanisha wadau wakuu wa sekta ya ujenzi na miundombinu, wakiwemo Wizara ya Ujenzi, Bodi ya Usajili wa Wakandarasi (CRB), Wakala wa Barabara Tanzania (TANROADS), Wakala wa Barabara za Vijijini na Mijini (TARURA), na Mamlaka ya Udhibiti wa Ununuzi wa Umma (PPRA).

Majadiliano yalijikita katika utekelezaji wa sera za usawa wa kijinsia, mikakati ya kuongeza uwiano wa wanawake katika miradi ya miundombinu, na umuhimu wa taasisi za kifedha katika kutoa nyenzo za kukuza biashara.

Kwa mujibu wa takwimu za CRB, wanawake wakandarasi nchini wanashiriki chini ya asilimia 15 ya miradi mikubwa ya ujenzi. Changamoto kuu ni pamoja na upatikanaji wa mitaji, masharti ya dhamana, na ukosefu wa taarifa za soko. Equity Bank imesisitiza dhamira yake ya kubadilisha hali hiyo kwa kutoa huduma zinazobadilika kulingana na mahitaji halisi ya wajasiriamali wanawake, ili kuongeza ushiriki wao kwenye miradi mikubwa na kuchangia kwa kiasi kikubwa pato la taifa.

Hatua ya kudhamini na kushiriki kikamilifu kwenye mkutano wa TWCA inachukuliwa kama kielelezo cha kujitolea kwa benki hiyo katika kuhimiza ukuaji jumuishi na ustawi wa jamii. Kwa kushirikiana kwa karibu na sekta binafsi, taasisi za kifedha na wadau wa sera, Equity Bank inaamini mazingira ya biashara yatakuwa rafiki zaidi kwa wanawake, na hivyo kuongeza mchango wao katika ukuaji wa uchumi wa taifa.