SERIKALI YAIPONGEZA NMB KWA KUCHANGIA MILIONI 30/- TAIFA STARS CHAN 2024

NA MWANDISHI WETU, DAR ES SALAAM

Serikali imeishukuru na kuipongeza Benki ya NMB kwa mchango wa Shilingi Milioni 30/- ili kuhamasisha mashabiki na wachezaji wa Taifa Stars kuelekea mchezo wa robo fainali ya Michuano ya Mataifa ya Afrika kwa Wachezaji wa Ndani (CHAN 2024) dhidi ya Morocco, utakaochezwa Ijumaa, Agosti 22, kwenye Uwanja wa Benjamin Mkapa jijini Dar es Salaam.

Serikali yashukuru na kutoa wito kwa wadau

Akizungumza wakati wa kupokea hundi ya mfano ya mchango huo, Katibu Mkuu wa Wizara ya Habari, Utamaduni, Sanaa na Michezo, Gerson Msigwa, aliishukuru NMB kwa mchango huo na kusisitiza kuwa benki hiyo imeonesha mfano wa kuigwa katika kuunga mkono jitihada za Rais Samia Suluhu Hassan.

“Serikali inawashukuru sana NMB. Wizara itamuorodhesha Afisa Mtendaji Mkuu wa NMB, Bi. Ruth Zaipuna, kama mmoja wa wanamichezo wa kupigiwa mfano. NMB ni ndugu zetu na mchango huu ni wa kupongezwa,” alisema Msigwa.

 

Aidha, Msigwa alitoa wito kwa makampuni, mashirika na taasisi nyingine kuunga mkono jitihada hizo, akisisitiza kuwa huu ndio wakati wa Watanzania wote kushirikiana kuhakikisha Taifa Stars inafanya vizuri.

Mgawanyo wa fedha za NMB

Kwa mujibu wa maelezo ya Mkuu wa Idara ya Mauzo na Mtandao wa Matawi ya NMB, Donatus Richard, kati ya Shilingi Milioni 30 zilizotolewa:

• Sh. Mil. 20 zitanunua tiketi kwa mashabiki 10,000 watakaohamasishwa kushangilia uwanjani.
• Sh. Mil. 10 ni motisha kwa wachezaji wa Taifa Stars.

“Tunataka kuwapa wachezaji na mashabiki ari zaidi. Kauli mbiu yetu kuelekea CHAN ni ‘Litakuja Nyumbani’, na tunaamini vijana wetu watafanikisha hilo,” alisema Donatus.

Ushirikiano kuendelea

Donatus aliongeza kuwa NMB itaendelea kushirikiana na Wizara ya Habari, Utamaduni, Sanaa na Michezo, Baraza la Michezo la Taifa (BMT) na Shirikisho la Soka Tanzania (TFF) ili kuhakikisha soka la Tanzania linapiga hatua na Taifa Stars inapata mafanikio makubwa zaidi.

---

📌 Endelea kufuatilia Kitomari Banking & Finance Blog kwa habari zaidi kuhusu sekta ya fedha, michezo na maendeleo ya kiuchumi nchini na kimataifa.