PUMA ENERGY, AMEND WASHIRIKIANA KUELIMISHA WANAFUNZI KUPITIA MAHAKAMA KIFANI YA WATOTO

Mwanafunzi wa darasa la saba katika Shule ya Msingi Kibugumo ya Kigamboni, Munir Said Mussa (12), katikati, akimhoji mmojawapo wa dereva aliyekamatwa nje ya barabara karibu na shule hiyo katika ‘Mahakama Kifani ya Watoto’ kwa kukiuka alama za barabarani ikiwa ni sehemu ya kampeni ya ‘Be Road Safe Africa’ inayoendeshwa na kampuni ya Puma Energy Tanzania na shirika la Amend nchini.

Katika kuadhimisha Wiki ya Usalama Barabarani Duniani (May 12 - 18, 2025), kampuni ya Puma Energy Tanzania kwa kushirikiana na shirika la Amend Tanzania wameendesha 'Mahakama Kifani ya Watoto' kuhusu usalama barabarani tukio ambalo ni sehemu muhimu ya programu ya kampeni ya elimu ya usalama barabarani kwa shule za msingi ambayo pia inajulikana kama ‘Be Road Safe Africa’. Tukio hilo lilifanyika katika Shule ya Msingi ya Kigamboni, jijini Dar es Salaam, kuanzia mwanzoni mwa wiki na kuhitimisha siku ya Ijumaa ya Mei 16.

Awamu ya kwanza ya kampeni ya ‘Be Road Safe Africa’, ilitekelezwa mwaka 2023 na 2024, ambapo iliwafikia watoto zaidi ya 38,000 katika shule 20 za nchini Tanzania, Botswana, Zambia, na Zimbabwe. Awamu ya pili itatekelezwa katika nchi za Tanzania, Botswana, Zambia, Zimbabwe, na Afrika ya Kusini. Kwa nchini Tanzania awamu hii imezinufaisha shule tano ambazo ni: Kisukuru (Tabata), Kunguru (Goba), Mjimpya (Kurasini), Ufukoni (Kigamboni), na Salasala (Salasala).

Kampeni ya mwaka huu imewafikia zaidi ya wanafunzi 6,960 kupitia njia rahisi na shirikishi za kujifunzia, ikiwemo simulizi za hadithi, michezo - inayohusiana na masuala ya usalama barabarani na ‘Mahakama ya Watoto’. Wakati wa mahakama hii, wanafunzi hujifanya kama ‘majaji wa usalama barabarani’ ili kuwasaidia madereva kuelewa umuhimu wa kuzingatia usalama. Cha kuvutia zaidi, zaidi ya wanafunzi 290 wa chekechea pia walikuwa miongoni mwa wanufaika wa elimu ya usalama barabarani kupitia mpango huo.

Katika vifo 31 kwa kila watu 100,000, WHO inaripoti kwamba vifo vinavyotokana na ajali za barabarani nchini Tanzania ni karibu mara 1.7 ya kiwango cha kimataifa na juu zaidi ya wastani wa Afrika. Takwimu za Jeshi la Polisi Tanzania zinaonyesha kuwa mwaka 2024 pekee, nchi ilirekodi ajali 1,735 za barabarani ambapo ajali 1,198 kati ya hizo zilisababisha vifo vya Watu 1,715. Makosa ya kibinadamu, ikiwemo kupuuzia alama za barabarani, kuendesha gari kwa uzembe, na mwendokasi, vilichangia 97% ya matukio haya.

Programu ya ‘Be Road Safe Africa’ ni sehemu ya dhamira ya Puma Energy Tanzania ya kusaidia usalama na ustawi wa jamii, hasa jamii zilizo katika mazingira magumu na maeneo hatarishi. Kupitia mafunzo ya mbinu mbalimbali, mashindano, na uboreshaji wa miundombinu, programu hii inasaidia kuzifanya barabara zetu kuwa salama kwa watoto wa shule nchini.